കൊളംബോ: ശ്രീലങ്കയില്‍ 257 പേരുടെ മരണത്തിനിടയാക്കിയ സ്‌ഫോടന പരമ്പരയുടെ മുഖ്യ ആസൂത്രകനായ സഹ്‌റാന്‍ ഹാഷിം ചാവേര്‍ ബോംബുകളുമായി ബന്ധപ്പെട്ടത് സമൂഹമാധ്യമങ്ങള്‍ വഴിയെന്ന് മതനേതാക്കള്‍. ആറു യുവാക്കളെ സ്വയം ചാവേറുകളായി മാറാന്‍ പ്രേരിപ്പിക്കുന്നതിന് ഇയാള്‍ മാസങ്ങളോളം ചാറ്റ് റൂമുകളിലൂടെ പ്രവര്‍ത്തിച്ചതായി രാജ്യത്തെ മുസ്‌ലിം സമുദായ നേതാക്കള്‍ പറഞ്ഞു.
ഏപ്രില്‍ 21ന് ഷാന്‍ഗ്രി ലാ ഹോട്ടലില്‍ നടന്ന സ്‌ഫോടനത്തില്‍ സഹ്‌റാന്‍ ഹാഷിമും കൊല്ലപ്പെട്ടിരുന്നു. ആക്രമണവുമായി ബന്ധപ്പെട്ടു പ്രവര്‍ത്തിച്ച സഹോദരന്മാരായ ഇല്‍ഹാം ഇബ്രാഹിമിനെയും ഇന്‍സാഫ് ഇബ്രാഹിമിനെയും ഇയാള്‍ സ്വാധീനിച്ചിരുന്നതായി പൊലിസും മതനേതാക്കളും പറയുന്നു. ഇന്റര്‍നെറ്റിലൂടെ ഫേസ്ബുക്ക്, യുട്യൂബ് എന്നിവ വഴിയാണ് സഹ്‌റാന്‍ ഇവര്‍ക്ക് നിര്‍ദേശങ്ങള്‍ നല്‍കിയതെന്നു കരുതുന്നു. അതിനിടെ ശ്രീലങ്കയിലെ ആക്രമണാനന്തര ദൃശ്യങ്ങള്‍ പകര്‍ത്തുകയായിരുന്ന ഇന്ത്യക്കാരനായ ഫോട്ടോ ജേണലിസ്റ്റിനെ പൊലിസ് അറസ്റ്റ് ചെയ്തു. റോയിട്ടേഴ്‌സ് വാര്‍ത്താ ഏജന്‍സിക്കുവേണ്ടി ജോലി ചെയ്യുന്ന സിദ്ദീഖി അഹ്മദ് ദാനിഷിനെയാണ് അനുവാദമില്ലാതെ ഒരു സ്‌കൂളിലേക്ക് പ്രവേശിച്ചതിന് അറസ്റ്റ് ചെയ്തത്. നിഗംബോയിലെ സ്‌കൂള്‍ അധികൃതരുമായി സംസാരിക്കാനാണ് അദ്ദേഹം അവിടേക്ക് ചെന്നതെന്ന് റോയിട്ടേഴ്‌സ് പറഞ്ഞു. ഇയാളെ മെയ് 15 വരെ കോടതി റിമാന്‍ഡ് ചെയ്തിട്ടുണ്ട്.