ന്യൂഡല്‍ഹി: ലോക്‌സഭാ തിരഞ്ഞെടുപ്പില്‍ ഏറ്റവും കൂടുതല്‍ ജയസാധ്യത ബി.ജെ.പിക്കെന്ന് മുന്‍ ആം ആദ്മി നേതാവും തെരഞ്ഞെടുപ്പ് നിരീക്ഷകനുമായ യോഗേന്ദ്ര യാദവിന്റെ എക്‌സിറ്റ് പോള്‍. ബി.ജെ.പിക്ക് ഒറ്റയ്ക്ക് കേവലഭൂരിപക്ഷം ലഭിക്കുമെന്ന് ഉറപ്പാക്കാനാവില്ലെങ്കിലും സഖ്യകക്ഷികളുടെ കൂടി പിന്തുണയോടെ എന്‍.ഡി.എ സര്‍ക്കാര്‍ അധികാരത്തിലേറുമെന്നാണ് അദ്ദേഹത്തിന്റെ സര്‍വേയില്‍ പറയുന്നത്.

പുല്‍വാമ ആക്രമണത്തിനും ബാലാക്കോട്ട് പ്രത്യാക്രമണത്തിനും ശേഷം മോദിയുടേയും ബി.ജെ.പിയുടേയും സാധ്യതകള്‍ വര്‍ദ്ധിച്ചതാണ് ഇതിന് കാരണമായി യോഗേന്ദ്ര യാദവ് പറയുന്നത്. 272 സീറ്റുകള്‍ നേടി ബി.ജെ.പി. ഒറ്റയ്ക്ക് അധികാരത്തില്‍ വരാനുള്ള സാധ്യതയും ഒട്ടും തള്ളിക്കളയാനാവില്ലെന്നും യോഗേന്ദ്ര യാദവ് പറയുന്നു.

നരേന്ദ്ര മോദി തന്നെ വീണ്ടും പ്രധാനമന്ത്രി പദത്തിലേക്ക് എത്തുമെന്നും പ്രവചനത്തില്‍ പറയുന്നുണ്ട്. ഇത് കൂടാതെ മറ്റു സാധ്യതകളും യാദവ് മുന്നോട്ട് വയ്ക്കുന്നുണ്ട്. ബി.ജെ.പി.ക്ക് കേവല ഭൂരിപക്ഷം നഷ്ടപ്പെട്ട് ബി.ജെ.പിയിലെ മറ്റൊരാള്‍ പ്രധാനമന്ത്രി ആകാനുള്ള സാധ്യത വളരെ കുറവാണെന്നാണ് പ്രവചനത്തില്‍ പറയുന്നത്.

2014 ലേത് പോലെ കേവല ഭൂരിപക്ഷം നേടിയ ബി.ജെ.പി ഒറ്റയ്ക്ക് അധികാരത്തില്‍ വരുന്നതാണ് മൂന്നാമത്തെ സാധ്യത. എന്നാല്‍ കോണ്‍ഗ്രസിനോടൊപ്പം മറ്റ് കക്ഷികള്‍ ചേര്‍ന്ന് മഹാസഖ്യം രൂപീകരിച്ച് ഒരു സര്‍ക്കാര്‍ അധികാരത്തില്‍ വരാന്‍ തീരെ സാധ്യതയില്ലെന്നും പ്രവചനത്തില്‍ പറയുന്നു.

മറ്റിടങ്ങളില്‍ ബി.ജെ.പിക്ക് സീറ്റുകള്‍ നഷ്ടപ്പെട്ടാലും ഉത്തരേന്ത്യയിലും കിഴക്കന്‍ സംസ്ഥാനങ്ങളിലും കൂടുതല്‍ സീറ്റുകള്‍ നേടുമെന്നാണ് പ്രവചനം. എന്നാല്‍ കണക്ക് തന്റെ മാത്രം നിഗമനമാണെന്നും പൂര്‍ണമായും ശരിയാവണമെന്ന് ഉറപ്പില്ലെന്നും യോഗേന്ദ്ര യാദവ് പറഞ്ഞു.