കാസര്‍കോട്: ട്രെയിന്‍ യാത്രക്കിടെ യാത്രക്കാരിയെ ഉടുമുണ്ട് പൊക്കി കാണിച്ചുവെന്ന കേസില്‍ ലോട്ടറി വില്‍പനക്കാരനെ റെയില്‍വേ പൊലിസ് അറസ്റ്റ് ചെയ്തു. തൃക്കരിപ്പൂര്‍ സ്വദേശിനിയായ 34കാരിയുടെ പരാതിയിലാണ് പുല്ലൂര്‍ വിഷ്ണുമംഗലം ഹരിപുരത്തെ തലക്കുളം സുധീഷ് (40)നെ കാസര്‍കോട് റെയില്‍വേ പൊലിസ് അറസ്റ്റ് ചെയ്തത്. തിങ്കളാഴ്ച രാത്രി ഏഴോടെ മംഗളുരുവില്‍നിന്ന് തിരുവനന്തപുരത്തേക്ക് പോകുന്ന മാവേലി എക്‌സ്പ്രസിന്റെ റിസര്‍വേഷന്‍ കോച്ചില്‍ യാത്ര ചെയ്യുകയായിരുന്ന യുവതിക്ക് നേരെയാണ് യുവാവ് കണ്ണിറുക്കുകയും ഉടുമുണ്ട് പൊക്കി കാണിക്കുകയും ചെയ്തത്. സംഭവം നടക്കുമ്പോള്‍ ട്രെയിന്‍ ചെറുവത്തൂര്‍ സ്റ്റേഷന്‍ വിട്ടിരുന്നു. യുവതി ബഹളം വച്ചതോടെ സഹയാത്രികരും റെയില്‍വേ പൊലിസും എത്തി ഇയാളെ തടഞ്ഞ് വെച്ചു.
തുടര്‍ന്ന് പയ്യന്നൂര്‍ റെയില്‍വേ സ്റ്റേഷനില്‍വച്ച് യുവതിയുടെയും ഭര്‍ത്താവിന്റെയും മൊഴി രേഖപ്പെടുത്തിയ ശേഷം യുവാവിനെ ഇതേ ട്രെയിനില്‍ കണ്ണൂര്‍ റെയില്‍വേ സ്റ്റേഷനിലെത്തിച്ചു. സംഭവത്തെ തുടര്‍ന്ന് മാവേലി എക്‌സ്പ്രസ് 15 മിനുട്ട് പയ്യന്നൂര്‍ സ്റ്റേഷനില്‍ നിര്‍ത്തിയിട്ടു. ഇന്നലെ രാവിലെ കണ്ണൂര്‍ റെയില്‍വേ പൊലിസ് വൈദ്യപരിശോധനയ്ക്കു ശേഷം പ്രതിയെ കാസര്‍കോട് റെയില്‍വേ പൊലിസിനു കൈമാറി. കാസര്‍കോടെത്തിച്ച പ്രതിയെ അറസ്റ്റ് രേഖപ്പെടുത്തി.