ആലപ്പുഴ: എച്ച്-വണ്‍ എന്‍-വണ്‍ പനിക്കെതിരേ ജാഗ്രത പാലിക്കണമെന്ന് ജില്ലാ മെഡിക്കല്‍ ഓഫിസ് അറിയിച്ചു. ഈ രോഗത്തിന് ഫലപ്രദമായ ചികിത്സ എല്ലാ സര്‍ക്കാര്‍ ആരോഗ്യ കേന്ദ്രങ്ങളില്‍ നിന്നും സൗജന്യമായി ലഭിക്കും. ശ്വസിക്കാനുള്ള ബുദ്ധിമുട്ടോ ശ്വാസം മുട്ടലോ അനുഭവപ്പെട്ടാല്‍ ഉടനെ ഡോക്ടറെ സമീപിക്കണം.
ഗര്‍ഭിണികള്‍, പ്രമേഹരോഗികള്‍, മറ്റ് ദീര്‍ഘകാല രോഗമുള്ളവര്‍, പ്രായാധിക്യമുള്ളവര്‍ എന്നിവര്‍ക്ക് രോഗലക്ഷണമുണ്ടായാല്‍ ഉടന്‍തന്നെ ചികിത്സ തേടണം. പനി, ജലദോഷം, ചുമ, ശരീരവേദന, തൊണ്ടവേദന വിറയല്‍, ക്ഷീണം, തുടങ്ങിയവയാണ് എച്ച്-വണ്‍ എന്‍-വണ്‍ പനിയുടെ ലക്ഷണങ്ങള്‍. ചിലരില്‍ ഛര്‍ദിയും വയറിളക്കവും ഉണ്ടാകാം. ഇന്‍ഫ്‌ളുവന്‍സ വൈറസ് കാരണം ഉണ്ടാകുന്ന രോഗമാണ് എച്ച്-വണ്‍ എന്‍-വണ്‍ പനി. രോഗി തുമ്മുമ്പോഴും ചുമയ്ക്കുമ്പോഴും മൂക്കുചീറ്റുമ്പോഴും തുപ്പുമ്പോഴും വൈറസ് അന്തരീക്ഷത്തിലേക്ക് വ്യാപിക്കുകയും ഒരു മീറ്ററിനുള്ളില്‍ നില്‍ക്കുന്നവര്‍ക്ക് രോഗം പകരുകയും ചെയ്യുന്നു.
കൂടാതെ വൈറസാല്‍ മലിനമാക്കപ്പെട്ട വസ്തുക്കളുമായി സമ്പര്‍ക്കമുണ്ടായാലും രോഗപ്പകര്‍ച്ച ഉണ്ടാകുന്നു. രോഗിയുമായി അടുത്ത് ഇടപഴകുകയോ രോഗബാധ സ്ഥിരീകരിച്ച പ്രദേശത്ത് വസിക്കുകയാണെങ്കിലോ എച്ച്-വണ്‍ എന്‍-വണ്‍ പനിയാണോയെന്ന് സംശയിക്കേണ്ടതാണ്. തുമ്മുമ്പോഴും ചുമയ്ക്കുമ്പോഴും തൂവാല ഉപയോഗിക്കുക.
സോപ്പും വെള്ളവും ഉപയോഗിച്ച് കൈകള്‍ കൂടെക്കൂടെ കഴുകുക, രോഗികള്‍ കഴിയുന്നതും വീട്ടില്‍ത്തന്നെ വിശ്രമിക്കുക. ജോലിസ്ഥലം, വിദ്യാഭ്യാസ സ്ഥാപനങ്ങള്‍, പൊതുസ്ഥലം എന്നിവിടങ്ങളില്‍ നിന്നും ഒഴിഞ്ഞു നില്‍ക്കുക പൂര്‍ണവിശ്രമമെടുക്കുക എന്നീ കാര്യങ്ങളില്‍ ശ്രദ്ധ വേണമെന്നും മെഡിക്കല്‍ ഓഫിസ് അറിയിച്ചു.