വാടാനപ്പള്ളി: ഭരണപക്ഷ അധ്യാപകനേതാവ് ഇടപെട്ടു. പൈനൂര്‍ സ്‌കൂളില്‍ അധ്യാപികയെത്തില്ല. പൊതു വിദ്യാഭ്യാസ സംരക്ഷണയജ്ഞം ഏറെ മുന്നേറിയെന്നു പറയുന്ന കൈപ്പമംഗലം നിയോജക മണ്ഡലത്തിലെ എന്‍.എല്‍.പി പൈനൂരിലെ വിദ്യാര്‍ഥികളാണ് നാലാം ക്ലാസില്‍ ഈ അധ്യയന വര്‍ഷത്തില്‍ അധ്യാപികയില്ലാതെ വലയുന്നത്.
ഏറെ നാള്‍ അധ്യാപികക്കായി ഡി.ഡി ഓഫിസില്‍ കയറിയിറങ്ങിയാണ് രണ്ടു ദിവസം മുന്‍പ് അധ്യാപികയെ നിയമിച്ചുകൊണ്ട് ഉത്തരവ് ഇറങ്ങിയത്. സംരക്ഷിത അധ്യാപികയായി വെമ്പല്ലൂര്‍ ജി.എല്‍.പി സ്‌കൂളില്‍ ജോലി ചെയ്യുന്ന എ.സി ലിജി എന്ന അധ്യാപികയെയാണ് തൃശൂര്‍ ഡി.ഡി.ഇ.ഓഫിസ് പൈനൂര്‍ എന്‍.എല്‍.പി സ്‌കൂളിലേക്ക് നിയമിച്ചുകൊണ്ട് ഉത്തരവായത്.
ഉത്തരവ് ലഭിച്ച് തൊട്ടടുത്ത ദിവസം ജോലിക്ക് പ്രവേശിക്കുമെന്നു ഉറപ്പു നല്‍കിയ അധ്യാപികയാകട്ടെ തൊട്ടടുത്ത ദിവസം തന്നെ വിസമ്മതം അറിയിച്ചു ഡി.ഡി ഓഫിസില്‍ കത്തു നല്‍കി നിയമനം അസാധുവാക്കുകയായിരുന്നു. കൊടുങ്ങല്ലൂര്‍ ഉപജില്ലയിലെ പ്രമുഖ കെ.എസ്.ടി.എ നേതാവിന്റെ ഇടപെടലാണ് നിയമനം റദ്ദാക്കാനുള്ള നീക്കത്തിന് പിന്നിലെന്ന് ആരോപണം ഉയര്‍ന്നു കഴിഞ്ഞു.
ഈ നേതാവിന്റെ ഭാര്യ ഇതേ വിദ്യാലയത്തിലെ അധ്യാപികയുമാണത്രേ. ഏറെക്കാലത്തെ പ്രയത്‌നത്തിനു ശേഷം തങ്ങളുടെ വിദ്യാലയത്തിലേക്ക് നിയമിക്കപ്പെട്ട അധ്യാപികയും വരുന്നില്ലെന്നറിഞ്ഞതോടെ പ്രതിഷേധവുമായി എത്തിയിരിക്കുകയാണ് രക്ഷിതാക്കള്‍. പൊതുവിദ്യാഭ്യാസ സംരക്ഷണ യജ്ഞം പറയുന്നവര്‍ തന്നെയാണ് വിദ്യാര്‍ഥികളെ അനാഥരാക്കി മാറ്റുന്നതെന്ന് അവര്‍ ആരോപിക്കുന്നു. വിദ്യാഭ്യാസ മന്ത്രിക്കും പൊതുവിദ്യാഭ്യാസ ഡയറക്ടര്‍ക്കും പരാതി നല്‍കുവാന്‍ ഒരുങ്ങുകയാണവര്‍.