റിയാദ്: സഊദിയിൽ ഗുരുതര ട്രാഫിക് കേസുകൾ ഇനി കൈകാര്യം ചെയ്യുക പബ്ലിക് പ്രോസിക്യൂഷൻ. ഇതിനായി പബ്ലിക് പ്രോസിക്യൂഷന്‍ അസിസ്റ്റന്റ് അണ്ടര്‍ സെക്രട്ടറി ശൈഖ് അബ്ദുല്ല ബിന്‍ നാസിര്‍ അല്‍മുഖ്ബിലും സഊദി ട്രാഫിക് ഡയറക്ടറേറ്റ് മേധാവി മേജര്‍ ജനറല്‍ മുഹമ്മദ് അല്‍ബസ്സാമിയും തമ്മിൽ കരാറിൽ ഒപ്പുവെച്ചു. ഗുരുതരമായ ഒമ്പത് ട്രാഫിക് കേസുകളാണ് പബ്ലിക് പ്രോസിക്യൂഷന് കൈമാറുക. ഇതോടെ ഇത്തരം കേസുകളിൽ രാജ്യത്തെ ക്രിമിനൽ നടപടികൾ പ്രകാരമായിരിക്കും കേസുകൾ കൈകാര്യം ചെയ്യുക. അപകട സ്ഥലത്ത് നിന്നും ഒളിച്ചോടൽ ഉൾപ്പെടെയുള്ള വിവിധ കേസുകളാണ് നേരിട്ട് പ്രോസിക്യൂഷന് കൈമാറുക.

    അപകടത്തിൽ മരണം, അംഗവൈകല്യം, പരിക്കുകൾ സംഭവിക്കുക. അപകട സ്ഥലത്ത് നിന്നും ഡ്രൈവർ ഒളിച്ചോടൽ, അപകട സ്ഥലത്ത് വാഹനം നിർത്താതെ ഓടിച്ച് പോകുക, അപകടം ഉടൻ തന്നെ ട്രാഫിക് വിഭാഗത്തെ അറിയിക്കാതിരിക്കുക, പരിക്കേറ്റവർക്ക് സാധ്യമായ സഹായം നൽകാൻ തയ്യാറാകാതിരിക്കൽ, അപകടം നടത്തിയ വാഹനത്തിന്റെ ഡ്രൈവറെ മാറ്റി മറ്റൊരാളെ പ്രതിഷ്ഠിക്കൽ, കരുതിക്കൂട്ടി അപകടം ഉണ്ടാക്കൽ തുടങ്ങിയ ഗുരുതരമായ ഗുരുതരമായ ട്രാഫിക് പ്രശ്‌നങ്ങൾ ഉണ്ടാകുന്ന ഘട്ടങ്ങളിൽ ഉടൻ ട്രാഫിക് വകുപ്പ് പബ്ലിക് പ്രോസിക്യൂഷനെ അറിയിക്കുകയും പ്രോസിക്യൂഷൻ തുടർ നടപടികൾ സ്വീകരിക്കുകയും ചെയ്യും.