കോഴിക്കോട്: ജോലി കഴിഞ്ഞ് മടങ്ങുകയായിരുന്ന യുവതിയുടെ ശരീരത്തില്‍ ആസിഡ് ഒഴിച്ച ശേഷം കുത്തിപ്പരുക്കേല്‍പ്പിച്ച പ്രതി സുഭാഷ് വിദേശത്തേക്കു കടന്നതായി പ്രാഥമിക നിഗമനം.

പരിഞ്ഞപുറത്ത് സ്വപ്നക്കാണ് ആക്രമണത്തില്‍ ഗുരുതര പരുക്കേറ്റത്. മുന്‍ ഭര്‍ത്താവ് സുഭാഷാണ് തന്നെ ആക്രമിച്ചതെന്നാണ് സ്വപ്നയുടെ മൊഴി.

ഇയാള്‍ അഞ്ചു മാസം മുന്‍പാണ് കുവൈത്തിലേക്കു പോയിരുന്നത്. എന്നാല്‍ തിരിച്ചു നാട്ടിലേക്ക് വന്നത് ബന്ധുക്കള്‍ക്കൊന്നും അറിഞ്ഞിരുന്നില്ല. യുവതിയെ ആക്രമിക്കാനായി വിദേശത്തു നിന്ന് വന്ന് ഉടന്‍ തന്നെ തിരിച്ചുപോയെന്നാണ് പൊലിസ് നിഗമനം.

കാരശ്ശേരി പഞ്ചായത്തിലെ ആനയാത്ത് ശ്രീകൃഷ്ണ ക്ഷേത്ര പരിസരത്തുവച്ച് ഇന്നലെ വൈകിട്ട് 6.30നായിരുന്നു സംഭവം. ആക്രമണത്തില്‍ ഗുരുതരമായി പരുക്കേറ്റ യുവതി കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്.

ഗോതമ്പ റോഡിലെ സ്വകാര്യ സ്ഥാപനത്തില്‍ റിസപ്ഷനിസ്റ്റായ സ്വപ്ന ജോലി കഴിഞ്ഞ് വീട്ടിലേക്ക് മടങ്ങവെ വിജനമായ സ്ഥലത്തുവച്ച് ഒളിഞ്ഞിരുന്ന ഇയാള്‍ യുവതിയുടെ ശരീരത്തിലേക്ക് ആസിഡ് ഒഴിക്കുകയായിരുന്നു.

പിന്നീട് കത്തികൊണ്ട് കുത്തുകയും ചെയ്തു. പ്രാണരക്ഷാര്‍ഥം അടുത്തുള്ള വീട്ടിലേക്ക് ഓടിക്കയറിയ സ്വപ്നയെ നാട്ടുകാരാണ് ആശുപത്രിയിലെത്തിച്ചത്.

മുക്കം പൊലിസ് കേസെടുത്ത് അന്വേഷണം ആരംഭിച്ചു. അടുത്തിടെയാണ് ഇവര്‍ വിവാഹമോചനം നേടിയത്. പ്രതിയെ പിടികൂടാനായിട്ടില്ല.