കൊച്ചി: ഡീസല്‍വില വര്‍ധനയെ പ്രതിരോധിക്കാന്‍ എല്‍.എന്‍.ജി(ലിക്വിഡ് നാച്വറല്‍ ഗ്യാസ്)യിലേക്ക് മാറാനൊരുങ്ങി കെ.എസ്.ആര്‍.ടി.സി. തുടക്കത്തില്‍ 100 എല്‍.എന്‍.ജി. ബസുകള്‍ വാങ്ങാനാണ് തീരുമാനം.

പൊതുമേഖലാ കമ്പനിയായ പെട്രോനെറ്റ് എല്‍.എന്‍.ജി.യില്‍നിന്നാണ് ബസുകള്‍ വാങ്ങുക. ഒരു എല്‍.എന്‍.ജി. ബസിന് 37.5 ലക്ഷം രൂപയാണ് വില. ഡീസല്‍ ബസിന് 26 ലക്ഷവും. അധികംവരുന്ന 11.5 ലക്ഷം രൂപ സ.ബ്.സി.ഡിയായി നല്‍കാമെന്ന് പെട്രോനെറ്റ് എല്‍.എന്‍.ജി. അറിയിച്ചിട്ടുണ്ട്. കഴിഞ്ഞ 26ന് ചേര്‍ന്ന ബോര്‍ഡ് യോഗത്തിലാണ് തീരുമാനമുണ്ടായത്.

ഒരുലിറ്റര്‍ എല്‍.എന്‍.ജി.ക്ക് 46 രൂപയാണ് വില. അതുകൊണ്ടുതന്നെ എല്‍.എന്‍.ജി. ബസിന് കിലോമീറ്ററിന് പത്തുരൂപയാണ് ചെലവുവരുക. ഡീസല്‍ ബസിനിത് 20 രൂപയാണ്. എല്‍.എന്‍.ജി. ബസുകളില്‍ ക്രയോജനിക് ടാങ്കുകളാകും ഉണ്ടാവുക. ഒരു ടാങ്ക് എല്‍.എന്‍.ജി.യില്‍ 600 കിലോമീറ്റര്‍വരെ ഓടാനാകും. എ.സി.യുള്ളതും ഇല്ലാത്തതുമായ ബസുകള്‍ പെട്രോനെറ്റ് ഇറക്കുന്നുണ്ട്. ഏതുതരം ബസ് വേണമെന്ന് കെ.എസ്.ആര്‍.ടി.സി. പിന്നീട് അറിയിക്കും.