ബിഹാര്‍: മുന്‍മുഖ്യമന്ത്രിയുടെ സംസ്‌കാര ചടങ്ങിനിടെ ആചാരവെടി മുഴക്കാന്‍ ശ്രമിച്ച് നാണംകെട്ട് ബിഹാര്‍ പൊലിസ്. അന്തരിച്ച ജഗന്നാഥ് മിശ്രയുടെ സംസ്‌കാരച്ചടങ്ങിനിടെയാണ് ഔദ്യോഗിക ബഹുമതി നല്‍കാനായി 22 തോക്കുകള്‍ ഉപയോഗിച്ച് വെടിയുതിര്‍ത്തത്. എന്നാല്‍ ഇതില്‍ ഒന്നുപോലും പൊട്ടിയില്ല.

ജന്‍മദേശമായ സുപോള്‍ ജില്ലയിലെ ഗ്രാമത്തിലാണ് ശവസംസ്‌കാരം നടന്നത്. ഇവിടെ മുഖ്യമന്ത്രി നിതീഷ് കുമാര്‍, ഉപമുഖ്യമന്ത്രി സുശില്‍ കുമാര്‍ മോദി, ആരോഗ്യമന്ത്രി മംഗള്‍ പാണ്ഡേ എന്നിവരെത്തിയിരുന്നു. ഇവരുടെയെല്ലാം സാനിധ്യത്തിലാണ് പൊലിസ് സേനക്കും സര്‍ക്കാരിന് തന്നെയും നാണക്കേടുണ്ടാക്കുന്ന സംഭവമുണ്ടായത്. ആദ്യ ഉദ്യമം വിഫലമായതോടെ പൊലിസുകാര്‍ വീണ്ടം വീണ്ടും ശ്രമിച്ചെങ്കിലും എല്ലാം വെറുതേയാവുകയായിരുന്നു.