കൊച്ചി: കേരളത്തിലെ ഉള്‍നാടന്‍ മത്സ്യബന്ധനത്തിന്റെ വര്‍ഷം തോറുമുള്ള കണക്കെടുപ്പിനായി ശാസ്ത്രീയമായ മാര്‍ഗനിര്‍ദേശങ്ങളും അടങ്ങിയ പ്രോട്ടോക്കോള്‍ രൂപീകരിക്കും. സംസ്ഥാന പ്ലാനിങ് ബോര്‍ഡ് അംഗവും ടാറ്റ ഇന്‍സ്റ്റിറ്റ്യൂട്ട് ഓഫ് സോഷ്യല്‍ സയന്‍സിലെ ഡീനുമായ ഡോ. ആര്‍. രാംകുമാറിന്റെ നേതൃത്വത്തില്‍ സംസ്ഥാന ഫിഷറീസ് ഡിപ്പാര്‍ട്ട്‌മെന്റിലെ ഉന്നത ഉദ്യോഗസ്ഥരും കേരള ഫിഷറീസ് സമുദ്ര പഠന സര്‍വകലാശാല (കുഫോസ്), കേന്ദ്ര സമുദ്ര മത്സ്യ ഗവേഷണ കേന്ദ്രം (സി.എം.എഫ്.ആര്‍.ഐ, കൊച്ചി), കേന്ദ്ര ഉള്‍നാടന്‍ മത്സ്യ ഗവേഷണ കേന്ദ്രം (സി.ഐ.എഫ്.ആര്‍.ഐ, ബംഗളൂരു), കേന്ദ്ര ഓരുജല മത്സ്യ ഗവേഷണ കേന്ദ്രം (സി.ഐ.ബി.എ, ചെന്നൈ) എന്നീ സ്ഥാപനങ്ങളിലെ ശാസ്ത്രജ്ഞരും നടത്തിയ സംയുക്ത കൂടിയാലോചനയിലാണ് ഉള്‍നാടന്‍ മത്സ്യബന്ധനത്തിന്റെ കണക്കെടുപ്പിനായി പ്രോട്ടോക്കോള്‍ രൂപീകരിക്കാന്‍ തീരുമാനമായത്. കുഫോസ് ആസ്ഥാനത്ത് നടന്ന കൂടിയാലോചന യോഗത്തില്‍ വൈസ് ചാന്‍സലര്‍ ഡോ. എ. രാമചന്ദ്രന്‍ അധ്യക്ഷത വഹിച്ചു. കേരളത്തിലെ 44 നദികളില്‍ നിന്നും സംസ്ഥാനത്തുള്ള 47 അണക്കെട്ടുകളില്‍ നിന്നും കായലുകള്‍ ഉള്‍പ്പെടെയുള്ള അനേകം ഉള്‍നാടന്‍ ജലാശയങ്ങളില്‍ നിന്നും പിടിക്കുന്ന മത്സ്യങ്ങളുടെ അളവോ, മത്സ്യ ഇനങ്ങളുടെ തരംതിരിച്ചുള്ള കണക്കോ ശേഖരിക്കാനുള്ള ശാസ്ത്രീയ സംവിധാനങ്ങളൊന്നും ഇപ്പോള്‍ നിലവിലില്ല. സംസ്ഥാനത്തെ മത്സ്യകര്‍ഷകര്‍ കുളങ്ങളില്‍ കൃഷി ചെയ്യുന്ന മത്സ്യങ്ങളുടെയും ചെമ്മീനിന്റെയും കണക്കും ലഭ്യമല്ല.
യോഗത്തിലെ നിര്‍ദേശങ്ങള്‍ ഏകോപിപ്പിച്ച് ഡ്രാഫ്റ്റ് പ്രോട്ടോക്കോള്‍ ഒരു മാസത്തിനകം സര്‍ക്കാരിന് സമര്‍പ്പിക്കുമെന്ന് ഡോ. ആര്‍. രാംകുമാര്‍ അറിയിച്ചു.