ലണ്ടന്‍: ബ്രിട്ടീഷ് പ്രധാനമന്ത്രി ബോറിസ് ജോണ്‍സന്റെ നടപടിക്കെതിരേ യു.കെ സുപ്രിംകോടതി. പാര്‍ലമെന്റ് താത്കാലികമായി പിരിച്ചുവിട്ട നടപടി നിയമവിരുദ്ധമാണെന്നാണ് സുപ്രിംകോടതിയുടെ കണ്ടെത്തല്‍. ജോണ്‍സണ്‍ നിയമപരമായല്ല പ്രവര്‍ത്തിച്ചതെന്ന് വിധിച്ചത് 11അംഗ ജഡ്ജിംങ് കമ്മിറ്റിയാണ് പാര്‍ലമെന്റ് നിര്‍ത്തിവെക്കാനുള്ള തീരുമാനം ഹീനമാണെന്നും ബോറിസ് ജോണ്‍സണന്റെ രാഷ്ട്രീയ കൗശലമായിരുന്നെന്നും കോടതി നിരീക്ഷിച്ചു. ബോറിസ് ജോണ്‍സണ്‍ എലിസബത്ത് രാജ്ഞിയെ തെറ്റിദ്ധരിപ്പിച്ചതായിരിക്കാമെന്നും കോടതി അഭിപ്രായപ്പെട്ടു.

ബ്രെക്‌സിറ്റ് ചര്‍ച്ചകളുടെ സമയം പരിമിതപ്പെടുത്തുകയെന്ന ഉദ്ദേശത്തോടെ ബോറിസ് ജോണ്‍സണ്‍ പാര്‍ലമെന്റ് അഞ്ച് ആഴ്ചത്തേക്ക് നിര്‍ത്തിവെക്കുകയായിരുന്നു. ഇതിനെതിരെ വ്യാപക പ്രതിഷേധം ഉയര്‍ന്നിരുന്നു. സുപ്രിംകോടതിയുടെ നിരീക്ഷണത്തിന്റെ അടിസ്ഥാനത്തില്‍ പാര്‍ലമെന്റ് നാളെ ചേരുമെന്ന് സ്പീക്കര്‍ ജോണ്‍ ബെര്‍കോ വ്യക്തമാക്കിയിട്ടുണ്ട്. ബ്രിട്ടന്‍ യൂറോപ്യന്‍ യൂണിയന്‍ വിടണമെന്ന 2016ലെ ഹിതപരിശോധന നടപ്പാക്കാനുള്ള അവസാന തീയതി ഒക്‌ടോബര്‍ 31ആണ്.