കല്‍പ്പറ്റ: വനംവകുപ്പ് പിടിച്ചെടുത്ത 12 ഏക്കര്‍ ഭൂമി വിട്ടുനല്‍കണമെന്ന് ആവശ്യപ്പെട്ട് ഒരു വര്‍ഷത്തോളമായി കലക്ടറേറ്റ് പടിക്കല്‍ കാഞ്ഞിരത്തിനാല്‍ കുടുംബം നടത്തുന്ന സമരത്തില്‍ ഇടപെടണമെന്ന് ആവശ്യപ്പെട്ട് വയനാട് പ്രസ് ക്ലബ് ദേശീയമനുഷ്യാവകാശ കമ്മിഷന്‍ അംഗം ജസ്റ്റീസ് സിറിയക് ജോസഫിന് നിവേദനം നല്‍കി. വനംവകുപ്പിന്റെ നടപടി മൂലം കാഞ്ഞിരത്തിനാല്‍ ജോര്‍ജിന്റെ കുടുംബം തകര്‍ന്നതും ഇതുമൂലമുണ്ടായ മറ്റ് മനുഷ്യാവകാശ ലംഘനങ്ങളും ചൂണ്ടിക്കാട്ടിയാണ് നിവേദനം നല്‍കിയത്. ഭൂമി അന്യായമായിട്ടാണ് വനംവകുപ്പ് പിടിച്ചെടുത്തതെന്ന് വ്യക്തമാക്കുന്ന വിജിലന്‍സ് റിപ്പോര്‍ട്ടുകളും മറ്റ് രേഖകളും ഇതോടൊപ്പം സമര്‍പ്പിച്ചിട്ടുണ്ട്. പരാതി പരിഗണിച്ച് ഉചിതമായ നടപടി സ്വീകരിക്കാമെന്ന് മനുഷ്യാവകാശ കമ്മിഷന്‍ മാധ്യമ പ്രവര്‍ത്തകരോട് പറഞ്ഞു. ഇതേ ആവശ്യമുന്നയിച്ച് വയനാട് എം.പി. എം.ഐ ഷാനവാസ്, ബി.ജെ.പി. ജില്ലാ ജനറല്‍ സെക്രട്ടറി പി.ജി. ആനന്ദകുമാര്‍, സെക്രട്ടറി കെ.ശ്രീനിവാസന്‍ എന്നിവരും ദേശീയ മനുഷ്യാവകാശ കമ്മിഷന് പരാതി നല്‍കി.