സുല്‍ത്താന്‍ ബത്തേരി: മുത്തങ്ങ ഭൂസമരത്തില്‍ പങ്കെടുത്ത് കുടിയിറക്കപ്പെട്ട കുടുംബങ്ങള്‍ക്ക് ഭൂമി നല്‍കാനുള്ള നടപടി എങ്ങുമെത്തിയില്ല. സമരത്തില്‍ 800-ഓളം കുടുംബങ്ങളാണ് പങ്കെടുത്തിരുന്നത്. ഇതില്‍ ആദ്യഘട്ടത്തില്‍ 285 കുടുംബങ്ങള്‍ക്ക് ഭൂമി നല്‍കാന്‍ കഴിഞ്ഞ യു.ഡി.എഫ് സര്‍ക്കാര്‍ തീരുമാനിച്ചിരുന്നു.
ഇതിന്റെ തുടക്കമെന്ന നിലയില്‍ ഇക്കഴിഞ്ഞ ജനുവരി 22ന് കല്ലൂരിലെത്തിയ മുന്‍ മുഖ്യമന്ത്രി ഉമ്മന്‍ ചാണ്ടി ആറ് കുടുംബങ്ങള്‍ക്ക് കൈവശരേഖയും നല്‍കി. എന്നാല്‍ ഇതോടുകൂടി ഭൂവിതരണം നിലക്കുകയായിരുന്നു.
ബാക്കിയുള്ള കുടുംബങ്ങള്‍ക്ക് ഉടന്‍ കൈവശരേഖ നല്‍കുമെന്നും ബാക്കിവരുന്ന 100 കുടുംബള്‍ക്ക് രണ്ടാംഘട്ടമെന്ന നിലിയില്‍ ഒരുമാസത്തിനകം ഭൂമി നല്‍കുമെന്നുമായിരുന്നു പ്രഖ്യാപനം.
നിലവില്‍ സര്‍ക്കാരിന്റെ ലിസ്റ്റില്‍പ്പെട്ടവര്‍ ഭൂമിയെ സംബന്ധിച്ചുള്ള വിവരങ്ങള്‍ അന്വേഷിക്കുമ്പോള്‍ കൃത്യമായ വിവരം ലഭിക്കുന്നില്ലെന്ന് ഇവര്‍ പറയുന്നു.
അതേസമയം ഇവര്‍ക്കായി കണ്ടെത്തിയ ഭൂമിയിലെ കാട് വെട്ടിത്തെളിക്കാത്തതാണ് ഭൂവിതരണം വൈകാന്‍ കാരണമെന്നാണ് ഉദ്യോഗസ്ഥര്‍ നല്‍കുന്ന വിവരം. നിലവല്‍ ലിസ്റ്റില്‍ ഉള്‍പ്പെട്ട ഒട്ടുമിക്ക കുടംബങ്ങളും കോളനികളിലും മറ്റുമായി ദുരിത പൂര്‍ണമായി അന്തരീക്ഷത്തിലാണ് ജീവിക്കുന്നത്.