ജാര്‍ഖണ്ഡ്: വീടിനു പുറത്ത് ചത്ത പശുവിനെ കണ്ടതിനെ തുടര്‍ന്ന് യുവാവിന് ക്രൂരമര്‍ദനം. ജാര്‍ഖണ്ഡിലെ ഗിരിധ് ജില്ലയിലെ ദിയോരിക്ക് സമീപമാണ് ഞെട്ടിക്കുന്ന സംഭവം. ബെരിയ ഹതിയതാന്‍ഡ് ഗ്രാമവാസിയായ ഉസ്മാന്‍ അന്‍സാരിയാണ് ക്രൂര മര്‍ദനത്തിന് ഇരയായത്.

യുവാവിനെ മര്‍ദിച്ച ശേഷം അക്രമി സംഘം ഇയാളുടെ വീടിന്റെ ഒരു ഭാഗത്തിന് തീവെക്കുകയും ചെയ്തു. വീട്ടിനുള്ളില്‍ ആളുകള്‍ ഉള്ള സമയമായിരുന്നു അത്. പൊലിസ് തക്ക സമയത്ത് എത്തിയതിനാല്‍ വന്‍ ദുരന്തം ഒഴിവായി.

പൊലിസ് സ്ഥലത്ത് എത്തിയപ്പോഴേക്കും അന്‍സാരി അവശനിലയിലായിരുന്നു. വീടിന്റെ മുക്കാല്‍ ഭാഗവും അഗ്‌നിക്കിരയായതായി പൊലിസ് അറിയിച്ചു.

ഗുരുതരമായി പരിക്കേറ്റ അന്‍സാരിയെ ആശുപത്രിയിലെത്തിക്കാനുള്ള  പൊലിസിന്റെ ശ്രമം ജനക്കൂട്ടം തടഞ്ഞു. പാലിസിനു നേരെ രൂക്ഷമായ കല്ലേറുമുണ്ടായി. 50 ഓളം പൊലിസുകാര്‍ക്ക് പരുക്കേറ്റു.

ആകാശത്തേക്ക് വെടിയുര്‍തിത്ത് ജനക്കൂട്ടത്തെ വിരട്ടിയോടിച്ച ശേഷമാണ് അന്‍സാരിയെ ആശുപത്രിയിലേക്ക് കൊണ്ടുപോയത്.  ക്ഷീരകര്‍ഷകനായിരുന്നു ആക്രമണത്തിന് ഇരയായ അന്‍സാരിയെന്ന് പൊലിസ് പറഞ്ഞു.

 ആശുപത്രിയിലെ അത്യാഹിതവിഭാഗത്തില്‍ ചികിത്സയിലുള്ള അന്‍സാരിയുടെ നില മെച്ചപ്പെട്ടു വരുന്നതായി ഡോക്ടര്‍മാര്‍ വ്യക്തമാക്കി.