പാലക്കാട്: ഒരു കിലോ കഞ്ചാവുമായി നാലു യുവാക്കള്‍ പാലക്കാട് എക്‌സൈസിന്റെ പിടിയിലായി. ആലപ്പുഴ കുട്ടനാട് സ്വദേശികളായ ശ്രീക്കുട്ടന്‍ (23), കുമാര്‍(22) കൊല്ലം സ്വദേശി കളായ വിനീഷ് (20), ഷെഫീഖ് (23) എന്നിവരാണ് അറസ്റ്റിലായത്. സ്‌കൂള്‍, കോളജ് വിദ്യാര്‍ഥികള്‍ക്ക് വില്‍ക്കുന്നതിനായി കൊണ്ടു വന്നതായിരുന്നു കഞ്ചാവ്.
ട്രെയിനിലും മറ്റും രാത്രികാലങ്ങളില്‍ കഞ്ചാവ് കടത്തുന്നുണ്ടെന്ന പാലക്കാട് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ പി.കെ സതീഷിനു ലഭിച്ചരഹസ്യ വിവരത്തിന്റെ അടിസ്ഥാനത്തില്‍ ഒലവക്കോട് റെയില്‍ വേ സ്‌റ്റേഷനില്‍ രാത്രിയില്‍ നടത്തിയ പരിശോധനയിലാണ് പ്രതികളെ പിടികൂടിയത്. പാലക്കാട് എക്‌സൈസ് സര്‍ക്കിള്‍ ഓഫിസിലെ എക്‌സൈസ് ഇന്‍സ്‌പെക്ടര്‍ വി.അനൂപിന്റെ നേതൃത്വത്തിലുള്ള സംഘമാണ് പ്രതികളെ കസ്റ്റഡിയില്‍ എടുത്തത്. ഇവര്‍ ഇതിനു മുമ്പും പല പ്രാവശ്യം കഞ്ചാവ് കടത്തിയിട്ടുള്ളതായി ചോദ്യം ചെയ്തതില്‍ നിന്നും വ്യക്തമായി. പ്രിവന്റീവ് ഓഫിസര്‍ ജെ.ആര്‍ അജിത്ത്, സിവില്‍ എക്‌സൈസ് ഓഫിസര്‍ വിനായകന്‍ ഡ്രൈവര്‍ ജയപ്രകാശ് എന്നിവരാണ് പാര്‍ട്ടിയില്‍ ഉണ്ടായിരുന്നത്.