കൊച്ചി: ട്രാഫിക് നിയമലംഘനം നടത്തുന്നവരെ പിന്തുടര്‍ന്നു പിടിക്കരുതെന്ന് ഹൈക്കോടതി. നിയമലംഘനം നടത്തുന്നവരെ കണ്ടെത്തുന്നതിന് ആധുനിക സംവിധാനങ്ങള്‍ ഉപയോഗപ്പെടുത്തണമെന്നും കോടതി നിര്‍ദേശിച്ചു.
ഡിജിറ്റല്‍ കാമറകള്‍, ട്രാഫിക് നിയന്ത്രണത്തിനുള്ള കാമറകള്‍, മൊബൈല്‍ ഫോണ്‍ കാമറകള്‍, കൈകളിലൊതുങ്ങുന്ന വിഡിയോ കാമറകള്‍ എന്നിവ പൊലിസ് ഉദ്യോഗസ്ഥരും മോട്ടോര്‍ വാഹനവകുപ്പും ഉപയോഗപ്പെടുത്തി കുറ്റക്കാരെ കണ്ടെത്തുന്നതിനു നടപടികള്‍ സ്വീകരിക്കണം. അപകടകരമായ രീതിയില്‍ വാഹനമോടിച്ചു വരുന്നവരുടെ വാഹനങ്ങളുടെ നമ്പര്‍ വയര്‍ലെസ് സംവിധാനത്തിലൂടെ വിനിമയം നടത്തി പ്രതികളെ കണ്ടെത്താവുന്നതാണ്.

പരിശോധനയുടെ ഭാഗമായി വാഹനങ്ങളുടെ മുന്‍പിലേക്ക് ചാടി തടഞ്ഞുനിര്‍ത്തരുത്. ഇരുചക്ര വാഹനങ്ങള്‍ പിന്തുടര്‍ന്നു പിടിക്കുന്നതിലൂടെയുണ്ടാകുന്ന അപകടങ്ങള്‍ പ്രതികളുടെയും ഓഫിസര്‍മാരുടെയും ജീവിതത്തെ ബാധിക്കുന്നതാണ്. മറ്റു മാര്‍ഗങ്ങളിലൂടെ പരിഹാരം കാണണം. വാഹനങ്ങള്‍ നിര്‍ത്തുന്നതിന് അടയാളങ്ങള്‍ മാത്രമേ ഉപയോഗിക്കാവൂ. ഭൗതികമായി വാഹനങ്ങള്‍ തടയരുതെന്നു പറഞ്ഞിട്ടുള്ളതാണെന്നും കോടതി വ്യക്തമാക്കി.
കഴിഞ്ഞ ഒക്ടോബര്‍ 10ന് കാടാമ്പുഴ പൊലിസ് കൈകാണിച്ചിട്ടും വാഹനം നിര്‍ത്താത്തതിനെ തുടര്‍ന്നു മോട്ടോര്‍ സൈക്കിള്‍ പിടിച്ചു നിര്‍ത്താന്‍ ശ്രമിച്ച ഉദ്യോഗസ്ഥനും മോട്ടോര്‍ സൈക്കിള്‍ ഓടിച്ചയാള്‍ക്കും സഹയാത്രികനും പരുക്കേറ്റിരുന്നു. ഇതേതുടര്‍ന്ന് ഔദ്യോഗിക കൃത്യനിര്‍വഹണം തടസപ്പെടുത്തിയെന്നും മറ്റും ചൂണ്ടിക്കാട്ടി കാടാമ്പുഴ പൊലിസ് രജിസ്റ്റര്‍ ചെയ്ത കേസിലെ പ്രതിയായ മുഫ്‌ലിബ് സമര്‍പ്പിച്ച ജാമ്യാപേക്ഷയിലാണ് കോടതി നിരീക്ഷണമുണ്ടായത്. മുഫ്‌ലിബിന് കോടതി മുന്‍കൂര്‍ ജാമ്യം അനുവദിച്ചു.