തേഞ്ഞിപ്പലം: കോഹിനൂര്‍ സെന്റ് പോള്‍സ് ഇംഗ്ലീഷ് മീഡിയം ഹയര്‍സെക്കന്‍ഡറി സ്‌കൂളില്‍ അധ്യാപക സമരം കാരണം അധ്യയനം അവതാളത്തിലായതില്‍ രക്ഷിതാക്കളുടെ പ്രതിഷേധം. ഇന്നലെ രാവിലെ സ്‌കൂളിലെത്തിയ നൂറോളം വരുന്ന രക്ഷിതാക്കള്‍ പ്രിന്‍സിപ്പലിനെ ഉപരോധിച്ചു.
മാനേജ്‌മെന്റ് പുറത്താക്കിയ രണ്ട് അധ്യാപകരെ തിരിച്ചെടുക്കണമെന്നാവശ്യപ്പെട്ട് പത്ത് ദിവസമായി 36 അധ്യാപകര്‍ സമരത്തിലാണ്. കേരള അണ്‍ എയ്ഡഡ് സ്‌കൂള്‍ ടീച്ചേഴ്‌സ് ആന്‍ഡ് സ്റ്റാഫ് യൂനിയന്റെ നേതൃത്വത്തിലാണ് സമരം. സ്ഥിരം അധ്യാപകര്‍ ഭൂരിഭാഗവും സമരത്തിലായതോടെ ക്ലാസുകള്‍ മുടങ്ങിയെന്ന് രക്ഷിതാക്കള്‍ പറയുന്നു. സമരം തീര്‍ക്കാന്‍ മാനേജ്‌മെന്റ് ഇടപെടുകയോ പകരം സംവിധാനം ഏര്‍പ്പെടുത്തുകയോ ചെയ്യുന്നില്ലെന്നാണ് പരാതി. പരാതിയുമായി പ്രിന്‍സിപ്പലിന്റെ മുറിയില്‍  രാവിലെ പത്ത് മണിയോടെയാണ് രക്ഷിതാക്കള്‍ തടിച്ചു കൂടിയത്.
പൊലിസും സ്ഥലത്തെത്തി. വരാന്തയിലും ഹാളിലുമായി രക്ഷിതാക്കള്‍ ഒന്നരമണിക്കൂറോളം കുത്തിയിരുന്നു. തിരൂരങ്ങാടി സി.ഐ. വി. ബാബുരാജ് ഇടപെട്ടാണ് ഇവരെ പിന്തിരിപ്പിച്ചത്. മാനേജ്‌മെന്റുമായി ചര്‍ച്ച ചെയ്ത് വ്യാഴാഴ്ച വൈകുന്നരം തീരുമാനമെടുക്കാമെന്ന ഉറപ്പില്‍ രക്ഷിതാക്കള്‍ മടങ്ങുകയായിരുന്നു.