മുംബൈ: സംസ്ഥാനത്തു പൊലിസിന്റേതടക്കം ബാങ്ക് അക്കൗണ്ടുകള്‍ ആക്‌സിസ് ബാങ്കില്‍നിന്നു പൊതുമേഖലാ ബാങ്കിലേക്കു മാറ്റാനുള്ള തീരുമാനത്തില്‍ ബി.ജെ.പി, ശിവസേനാ തര്‍ക്കം. മുന്‍ മുഖ്യമന്ത്രിയും ബി.ജെ.പി നേതാവുമായ ദേവേന്ദ്ര ഫഡ്‌നാവിസിന്റെ ഭാര്യ അമൃത ഫഡ്‌നാവിസ് ഉയര്‍ന്ന പദവി വഹിക്കുന്ന ബാങ്കില്‍നിന്നു സര്‍ക്കാര്‍ അക്കൗണ്ടുകള്‍ മാറ്റുന്നതിനെതിരേ അമൃത രംഗത്തെത്തി. ഈ നീക്കം പ്രതികാരബുദ്ധിയോടെയാണെന്നു പറഞ്ഞ അവര്‍, ഫഡ്‌നാവിസുമായുള്ള തന്റെ വിവാഹത്തിനു മുന്‍പാണ് അക്കൗണ്ടുകള്‍ ആക്‌സിസ് ബാങ്കില്‍ ആരംഭിച്ചിരുന്നതെന്നു വ്യക്തമാക്കി. എന്നാല്‍, അമൃതയ്ക്കു മറുപടിയുമായി ശിവസേനാ നേതാവ് പ്രിയങ്കാ ചൗധരി രംഗത്തെത്തി. സര്‍ക്കാര്‍ കാര്യങ്ങള്‍ പ്രതികാര ബുദ്ധിയാണെന്ന് ഒരു ബാങ്ക് ജീവനക്കാരി പറയുന്നതില്‍ തനിക്ക് അത്ഭുതം തോന്നിയെന്നായിരുന്നു അവരുടെ ട്വീറ്റ്.