കൊച്ചി: ക്രിക്കറ്റ് അസോസിയേഷന്‍ ഫോര്‍ ദി ബ്ലൈന്‍ഡ് ഇന്‍ കേരള കാഴ്ച്ചപരിമിതിയുള്ള വനിതാ ക്രിക്കറ്റ് താരങ്ങള്‍ക്കായി ശനിയാഴ്ച്ച കാഴ്ച്ച പരിമിതിയുള്ള പെണ്‍കുട്ടികളെ സ്‌പോര്‍ട്ട്‌സിലൂടെ ശാക്തീകരിക്കുക എന്ന വിഷയത്തില്‍  ശില്‍പ്പശാല സംഘടിപ്പിക്കുന്നു.
രാവിലെ 9.30 മുതല്‍ 4 മണി വരെ കൊച്ചി ലേ മെറീഡിയന്‍ ഹോട്ടലില്‍ വെച്ച്  നടക്കുന്ന ശില്‍പശാല  കേരളാ ഫെഡറേഷന്‍ ഓഫ് ദി ബ്ലൈന്‍ഡ് യൂത്ത് ഫോറത്തിന്റെയും ലേ മെറിഡിയന്‍ ഹോട്ടലിന്റെയും സഹകരണത്തോടുകൂടിയാണ് . കാഴ്ച്ച പരിമിതരുടെ ക്രിക്കറ്റിനെ കൂടുതല്‍ ഉയരത്തില്‍ എത്തിക്കുന്നതിനോടൊപ്പം വനിതാ ക്രിക്കറ്റ് കളിക്കാരെ കണ്ടെത്തുകയും പ്രോത്സാഹനം നല്‍കുകയുമാണ് പരിപാടിയുടെ ലക്ഷ്യം.
താത്പര്യമുള്ളവര്‍ക്ക് പരിശീലനത്തിന് സൗകര്യമൊരുക്കുന്നതിനോടൊപ്പം താഴെ തട്ടു മുതല്‍ അന്തര്‍ ദേശീയ തലത്തില്‍ വരെയുള്ള ക്രിക്കറ്റ് ടൂര്‍ണമെന്റുകളില്‍ കളിക്കാന്‍  പ്രാപ്തരാക്കും.
ദേശീയ തലത്തില്‍ ആരംഭിക്കാന്‍  പോകുന്ന കഴ്ച്ചപരിമിതിയുള്ളവരുടെ   വനിതാ ക്രിക്കറ്റ് ടീമിലേക്ക് കേരളത്തില്‍ നിന്നും താരങ്ങളെ സംഭാവന ചെയ്യുക എന്ന ഉദ്ദേശ്യം കൂടി പരിപാടിക്കുണ്ടെന്ന് ക്രിക്കറ്റ് അസോസിയേഷന്‍ ഫോര്‍ ദി  ബ്ലന്‍ഡ് ഇന്‍ ഇന്ത്യ സീനിയര്‍ വൈസ് പ്രസിഡന്റ് രജനീഷ് ഹെന്റ്രി പറഞ്ഞു.
കാഴ്ച്ച പരിമിതിയുള്ള വനിതകളെ കായിക രംഗത്തേക്ക് എത്തിക്കുക എന്ന ലക്ഷ്യത്തോടെ കേരളത്തില്‍ ആദ്യമായാണ് ഇത്തരത്തില്‍ ഒരു പരിപാടി നടക്കുന്നതെന്ന് ക്രിക്കറ്റ് അസോസിയേഷന്‍ ഫോര്‍ ദി ബ്ലൈന്‍ഡ് ഇന്‍ കേരള അറിയിച്ചു.