കൊച്ചി: നടിയെ ആക്രമിച്ച കേസിലെ മാഡം സിനിമാ മേഖലയില്‍ നിന്നുളളയാളാണെന്ന് കേസിലെ മുഖ്യപ്രതി പള്‍സര്‍ സുനി. ഇവര്‍ ആരാണെന്ന് ഓഗസ്റ്റ് പതിനാറാം തിയതി വെളിപ്പെടുത്തുമെന്നും സുനി വ്യക്തമാക്കി.

മാഡം കെട്ടുകഥയല്ലെന്ന് നേരത്തെ സുനി പറഞ്ഞിരുന്നു. മാഡം സിനിമാ രംഗത്ത് നിന്നുളള ഒരാളാണ്. ഇതറിയാനായി 16ാം തിയതി വരെ കാത്തിരിക്കണം. കേസില്‍ ഉള്‍പ്പെട്ട വിഐപി ഈ മാസം 16നുളളില്‍ കാര്യങ്ങള്‍ പറഞ്ഞില്ലെങ്കില്‍ താന്‍ തന്നെ കാര്യങ്ങള്‍ തുറന്നുപറയുമെന്നും സുനി പറഞ്ഞിരുന്നു.

വ്യാജ തിരിച്ചറിയല്‍ രേഖകള്‍ ഉപയോഗിച്ച് സിംകാര്‍ഡ് സംഘടിപ്പിച്ച കേസില്‍ കോട്ടയം ചീഫ് ജൂഡീഷ്യല്‍ മജിസ്‌ട്രേറ്റ് കോടതിയില്‍ ഹാജരായ ശേഷം പുറത്തിറങ്ങിയപ്പോഴാണ് സുനി ഇക്കാര്യം വെളിപ്പെടുത്തിയത്. കേസ് മറ്റൊരു ദിവസത്തേക്ക് മാറ്റി.