ചക്കരക്കല്‍: വെള്ളച്ചാല്‍-ഓടക്കടവ് റോഡിന്റെ വിപുലീകരണ പ്രവൃത്തി തുടങ്ങി.
വീതികൂട്ടി, ഓവുചാലുകള്‍ നിര്‍മിച്ച് പാലങ്ങളും കലുങ്കുകളും നിര്‍മിച്ചാണ് വിപുലീകരണ പ്രവൃത്തി നടത്തുന്നത്. റോഡിന്റെ ശോചനീയാവസ്ഥക്കെതിരേ വ്യാപക പ്രതിഷേധമുയര്‍ന്നിരുന്നു. ഏതാനും ബസുകള്‍ മാത്രമാണ് ഇതുവഴി ഇപ്പോള്‍ സര്‍വിസ് നടത്തുന്നത്. മക്രേരി അമ്പലത്തിലെ ഡി.ടി.പി.സിയുടെയും ദേവസ്വം ബോര്‍ഡിന്റെയും നേതൃത്വത്തില്‍ നിര്‍മിച്ച ദക്ഷിണാമൂര്‍ത്തി സ്മാരക മ്യൂസിയത്തിനു സമീപത്തുകൂടിയാണ് റോഡ് കടന്നുപോവുന്നത്. ചക്കരക്കല്‍-മൂന്നുപെരിയ റോഡില്‍ നിന്നു അഞ്ചരക്കണ്ടി-തലശ്ശേരി റോഡുമായി ബന്ധപ്പെടുത്തുന്ന എളുപ്പവഴിയാണിത്. ഓടക്കടവ് പാലം വരെ വിപുലീകരണം നടക്കുന്നതിനാല്‍ യാത്രാക്ലേശം നേരിടുന്ന ഈ പ്രദേശത്തേക്ക് കൂടുതല്‍ ബസ് റൂട്ടുകള്‍ അനുവദിക്കുമെന്ന പ്രതീക്ഷയിലാണ് നാട്ടുകാര്‍. ബാവോട്, പരിയാരം, മക്രേരി, പിലാഞ്ഞി തുടങ്ങി നിരവധി ഉള്‍നാടന്‍ ഗാമങ്ങളും വികസന പ്രതീക്ഷയിലാണ്.