ലക്‌നോ: മെട്രോയിലെ കന്നിയാത്ര ദുസ്വപ്‌നമായി യാത്രക്കാര്‍. ലക്‌നോ മെട്രോയിലെ കന്നിയാത്രയാണ് നൂറോളം ആളുകള്‍ക്ക് മറക്കാനാവാത്ത ദുരനുഭവമായത്.

സാങ്കേതികപ്പിഴവു മൂലം നിന്നുപോയതോടെആദ്യയാത്രയ്‌ക്കെത്തിയവര്‍ മെട്രോയില്‍ കുടുങ്ങുകയായിരുന്നു. രണ്ടര മണിക്കൂര്‍ നേരമാണ് ആളുകള്‍ മെട്രോയില്‍ കുടുങ്ങിയത്.

ഇന്നലെയായിരുന്നു ലക്‌നോ മെട്രോയുടെ ഉദ്ഘാടനം. മുഖ്യമന്ത്രി യോഗി ആദിത്യനാഥും കേന്ദ്ര ആഭ്യന്തരമന്ത്രി രാജ്‌നാഥ് സിങ്ങും ചേര്‍ന്നായിരുന്നു ഉദ്ഘാടനം നിര്‍വഹിച്ചത്.

മവൈയ്യ ദുര്‍ഗാപുരി എന്നീ സ്റ്റേഷനുകള്‍ക്കിടയിലല്‍ രാവിലെ ഏഴ് പതിനഞ്ചോടെയായിരുന്നു സംഭവം. ഡ്രൈവറുടെ അറിവില്ലാതെ മെട്രോയുടെ എമര്‍ജന്‍സി ബ്രേക്ക് തനിയെ പ്രവര്‍ത്തിച്ചതാണ് ട്രെയിന്‍ നിന്നുപോകാന്‍ കാരണമായത്.

സ്‌കൂള്‍ കുട്ടികള്‍ ഉള്‍പ്പെടെയുള്ളവരാണ് യാത്രക്കാരായുണ്ടായിരുന്നത്. എ.സിയോ ലൈറ്റുകളോ ഇല്ലാതെ പലരും അവശരായി. ഒടുവില്‍ ലക്‌നോ മെട്രോ റെയില്‍ കോര്‍പറേഷന്‍ ജീവനക്കാരെത്തി എമര്‍ജന്‍സി വാതിലിലൂടെയാണ് യാത്രക്കാരെ പുറത്തിറക്കിയത്.