മഥുര: ദേര സച്ച നേതാവും വിവാദ ആള്‍ദൈവവുമായ ഗുര്‍മീത് റാം റഹിമുമായി ബി.ജെ.പിക്ക് ഒരു തരത്തിലുള്ള ബന്ധവുമില്ലെന്ന് ഉത്തര്‍പ്രദേശ് ഉപമുഖ്യമന്ത്രി കേശവ് പ്രസാദ് മൗര്യ.
ഗുര്‍മീതുമായി ബി.ജെ.പിക്ക് അടുത്ത ബന്ധമുണ്ടെന്ന യു.പി മുന്‍ മുഖ്യമന്ത്രിയും സമാജ്‌വാദി പാര്‍ട്ടി നേതാവുമായ അഖിലേഷ് യാദവ് നടത്തിയ ആരോപണത്തോട് പ്രതികരിക്കുകയായിരുന്നു അദ്ദേഹം.
അഖിലേഷിന് വിഷാദ രോഗമാണ്. അതുകൊണ്ടാണ് അദ്ദേഹം ഇത്തരത്തില്‍ ആരോപണം ഉന്നയിക്കുന്നതെന്നും മൗര്യ പരിഹസിച്ചു.
നിരവധി ബി.ജെ.പി നേതാക്കള്‍ ദേര ആശ്രമത്തിലെത്തി ഗുര്‍മീതിനൊപ്പം എടുത്ത ഫോട്ടോകള്‍ കഴിഞ്ഞ ദിവസം അഖിലേഷ് പുറത്തുവിട്ടിരുന്നു. എന്നാല്‍ അഖിലേഷിന്റെ ആരോപണം ശരിയല്ലെന്ന് പറഞ്ഞ മൗര്യ, ഗുര്‍മീതുമായി നേതാക്കള്‍ക്ക് ബന്ധമില്ലെന്ന് വ്യക്തമാക്കുകയും ചെയ്തു.
അതേസമയം ഹരിയാനയിലെ ബി.ജെ.പി നേതാക്കളായ രാം വിലാസ് ശര്‍മ, അനില്‍ വിജ്ജ്, ഗ്രോവര്‍ എന്നീ നേതാക്കള്‍ 1.12 കോടി രൂപ ദേര നേതാവിന് പാരിതോഷികം നല്‍കിയിരുന്നതായ വിവരം പുറത്തുവന്നിട്ടുണ്ട്. എന്നാല്‍ ഇതിനോട് പ്രതികരിക്കാന്‍ മൗര്യ തയാറായില്ല.
രാംവിലാസ് ശര്‍മ ഹരിയാനയിലെ വിദ്യാഭ്യാസ മന്ത്രിയാണ്. 51 ലക്ഷം രൂപയുടെ ചെക്കാണ് അദ്ദേഹം ഗുര്‍മീതിന് നല്‍കിയിരുന്നത്.