റിയാദ്: സഊദിയില്‍ ടൂറിസം കേന്ദ്രങ്ങള്‍ സന്ദര്‍ശിക്കാന്‍ മാത്രം ലക്ഷ്യം വെച്ചുള്ള ടൂറിസം വിസ ഉടന്‍ പ്രാബല്യത്തില്‍ വരും. ആദ്യഘട്ടത്തില്‍ ചില പ്രത്യേക ടൂറിസം ഓപ്പറേറ്റര്‍മാര്‍ക്ക് അനുവദിക്കുന്ന ഗ്രൂപ്പ് ടൂറിസം വിസകളായിരിക്കും അനുമതി നല്‍കുകയെന്ന് അധികൃതരെ ഉദ്ധരിച്ച് പ്രാദേശിക പത്രം റിപ്പോര്‍ട്ട് ചെയ്തു. രാജ്യത്തെ ടൂറിസം രംഗത്ത് പേരുകേട്ട തബ്ബോക്കിലെ ചരിത്ര നാഗരികള്‍ സന്ദര്‍ശിക്കാനുള്ള ടൂറിസം വിസകളായിരിക്കും ആദ്യം അനുവദിക്കുകയെന്നു തബൂക്ക് ഡെവലപ്‌മെന്റ് കൗണ്‍സില്‍, ശൂറാ കൗണ്‍സില്‍ മെംബറുമായ ജമാല്‍ അല്‍ ഫഖ്‌രി പറഞ്ഞു.
      
പബ്ലിക് ഇന്‍വെസ്റ്റ്‌മെന്റ് ഫണ്ടിന്റെ സഹായത്തോടെയാണ് ടൂറിസം വികസനം സാധ്യമാക്കുന്നത്. സഊദി തൊഴില്‍ രംഗത്തെത്തും കൂടുതല്‍ സാധ്യതകളും ടൂറിസം മൂലം ലക്ഷ്യമാക്കുന്നുണ്ട്. സഊദി കമ്മീഷന്‍ ഫോര്‍ ടൂറിസം ആന്‍ഡ് നാഷണല്‍ ഹെറിറ്റെജും കൂടുതല്‍ പദ്ധതികള്‍ ആവിഷ്‌കരിക്കുന്നുണ്ട്. നേരത്തെ തന്നെ സഊദി അധികൃതര്‍ ഉംറയോടൊപ്പം ടൂറിസം കേന്ദ്രങ്ങള്‍ സന്ദര്‍ശിക്കാനുള്ള വിസ സമ്പ്രദായം നടപ്പിലാക്കാന്‍ ശ്രമിക്കുമെന്ന് അറിയിച്ചിരുന്നു.