കൊച്ചി: സംസ്ഥാനത്തെ ഹയര്‍സെക്കന്‍ഡറി വിദ്യാലയങ്ങളില്‍ ക്രിസ്മസ് ദിനത്തില്‍ നാഷണല്‍ സര്‍വിസ് സ്‌കീമിന്റെ സഹവാസ ക്യാംപ് നടത്താനുള്ള ഹയര്‍ സെക്കന്‍ഡറി ഡയറക്ടറേറ്റിന്റെ ഉത്തരവ് ഭേദഗതി ചെയ്യണമെന്ന് കേരള കാത്തലിക് ടീച്ചേഴ്‌സ് ഗില്‍ഡ് സംസ്ഥാനസമിതി ആവശ്യപ്പെട്ടു. നിലവിലുള്ള ഉത്തരവനുസരിച്ച് ഡിസംബര്‍ 23നോ 24നോ സപ്തദിന സഹവാസ ക്യാംപ് ആരംഭിക്കണമെന്നാണ് നിര്‍ദേശം.
ക്യാംപില്‍ പങ്കെടുക്കാത്ത വിദ്യാര്‍ഥികള്‍ക്ക് ഗ്രേസ് മാര്‍ക്കും സര്‍ട്ടിഫിക്കറ്റും ലഭ്യമാകില്ല. ഇതു മൂലം ആയിരക്കണക്കിന് വിദ്യാര്‍ഥികള്‍ക്കും നൂറുകണക്കിന് അധ്യാപകര്‍ക്കും ദേവാലയങ്ങളിലെ ക്രിസ്മസ് തിരുക്കര്‍മങ്ങളില്‍ പങ്കെടുക്കുന്നതിനും കുടുംബാംഗങ്ങളോടൊപ്പം ക്രിസ്തുമസ് ആഘോഷിക്കുന്നതിനുമുള്ള അവസരം നിഷേധിക്കപ്പെടുകയാണെന്ന് സമിതി പറഞ്ഞു.
കെ.സി.ബി.സി വിദ്യാഭ്യാസ കമ്മിഷന്‍ സെക്രട്ടറി ഫാ. ജോസ് കരിവേലിക്കല്‍ യോഗം ഉദ്ഘാടനം ചെയ്തു.