പുകവലി ഏത് പ്രായത്തിലും ഉപേക്ഷിക്കാമെന്നും, ഉപേക്ഷിച്ചാല്‍ ശരീരത്തിന് മികച്ച നേട്ടങ്ങളുണ്ടാകുമെന്നും പഠന റിപ്പോര്‍ട്ട്. ഏത് പ്രായത്തില്‍ പുകവലി ഉപേക്ഷിച്ചാലും ശ്വാസകോശ അര്‍ബുദം, മറ്റ് ശാരീരിക പ്രശ്‌നങ്ങള്‍ എന്നിവയില്‍ നിന്നും രക്ഷ നേടാമെന്ന് പുതിയ പഠനങ്ങള്‍ പറയുന്നത്.പുകവലി നിര്‍ത്തി പതിനഞ്ച് വര്‍ഷം പൂര്‍ത്തീകരിച്ചവര്‍ക്ക്, പുകവലിക്കാത്തവരെക്കാള്‍ അര്‍ബുദ സാധ്യത പകുതിയാണെന്നും മേഖലയില്‍ ഗവേഷണം നടത്തിയവര്‍ കണ്ടെത്തിയിട്ടുണ്ട്.ദക്ഷിണകൊറിയയിലെ സിയോളിലെ നാഷണല്‍ കാന്‍സര്‍ സെന്ററിന്റെ ആഭിമുഖ്യത്തില്‍ 30 ലക്ഷം കൊറിയക്കാരിലാണ് പ്രസ്തുത പഠനം നടത്തിയത്.

13 വര്‍ഷവും അഞ്ച് മാസവും നീണ്ട ഫോളോഅപ്പ് പഠനത്തില്‍ പുകവലി നിര്‍ത്തിവയവരിലെ ശ്വാസകോശ അര്‍ബുദ സാധ്യത 42 ശതമാനവും കരള്‍ അര്‍ബുദ സാധ്യത 27 ശതമാനവും കൊളോറെക്ടല്‍ അര്‍ബുദ സാധ്യത 20 ശതമാനവും വയറിലെ അര്‍ബുദ സാധ്യത 14 ശതമാനവും കുറഞ്ഞതായി നിരീക്ഷിച്ചു. പുകവലി നിര്‍ത്താതെ തുടര്‍ന്നു കൊണ്ടിരിക്കുന്നവരെ അപേക്ഷിച്ചാണ് ഈ താരതമ്യം. കൂടാതെ
50 വയസ്സിന് മുന്‍പ് പുകവലി നിര്‍ത്തിയവര്‍ക്ക് അത് തുടരുന്നവരെ അപേക്ഷിച്ച് ശ്വാസകോശ അര്‍ബുദ സാധ്യത 57 ശതമാനം കുറവാണെന്ന് ഗവേഷകര്‍ നിരീക്ഷിച്ചു. 50 വയസ്സിലോ അതിന് ശേഷമോ നിര്‍ത്തുന്നവരില്‍ പുകവലി തുടരുന്നവരെ അപേക്ഷിച്ച് അര്‍ബുദ സാധ്യത 40 ശതമാനം കുറവാണ്.