കോഴിക്കോട്: ജനവാസ മേഖലയായ കോഴിക്കോട് കൂരാചുണ്ട് കോട്ടപ്പാലത്ത് കാട്ടുപോത്തിറങ്ങി. ആളുകള്‍ക്ക് പിന്നാലെ ഓടിയ പോത്ത് ജനങ്ങള്‍ക്കിടയില്‍ ഭീതി സൃഷ്ടിച്ചിരിക്കുകയാണ്. ആളപായമോ നാശനഷ്ടങ്ങളോ ഉണ്ടായിട്ടില്ല. വീടുകളുടെ കോംപൗണ്ടിനുള്ളിലേക്കും പോത്തുകള്‍ കയറുന്നുണ്ട്.

കൂടുതല്‍ ആളുകളുള്ള കൂരാചുണ്ട് അങ്ങാടിയിലാണ് കാട്ടുപോത്ത് നിലയുറപ്പിച്ചിരിക്കുന്നത്. വനം വകുപ്പിനെ വിവരം അറിയിച്ചിട്ടുണ്ടെങ്കിലും ഇതുവരെ പോത്തിനെ പിടികൂടാന്‍ കഴിഞ്ഞിട്ടില്ല. പെരുവണ്ണാമുഴി വനമേഖലയില്‍ നിന്നാവാം കാട്ടുപോത്ത് എത്തിയതെന്നാണ് നിഗമനം. വനംവകുപ്പ് ഉദ്യോഗസ്ഥര്‍ സ്ഥലത്തെത്തിയിട്ടുണ്ട്. കൂരാച്ചുണ്ട് സെന്റ് തോമസ് യു.പി സ്‌കൂളിന് അവധിപ്രഖ്യാപിച്ചു.