ന്യൂഡല്‍ഹി: പൊലിസും കര്‍ഷകരും തമ്മില്‍ സംഘര്‍ഷം തുടരുന്ന ഡല്‍ഹിയില്‍ കര്‍ഷകര്‍ വീണ്ടും ചെങ്കോട്ടയ്ക്കു മുകളില്‍ കയറി കൊടി നാട്ടി. നേരത്തെ ഉച്ചയ്ക്ക് ഒരുമണിയോടെ കര്‍ഷകര്‍ ട്രാക്ടറുകളുമായി ചെങ്കോട്ടയിലെത്തി കൊടി നാട്ടിയിരുന്നു.

ഇവരെ പിന്നീട് പൊലിസെത്തി ഒഴിപ്പിച്ചു. എന്നാല്‍ സിംഘുവില്‍ നിന്നുള്ളവരടക്കം കൂടുതല്‍ കര്‍ഷകര്‍ ട്രാക്ടറുകളുമായി എത്തുകയും ചെങ്കോട്ട വളയുകയുമായിരുന്നു. വീണ്ടും ചെങ്കോട്ടയ്ക്കു മുകളില്‍ കയറിയ കര്‍ഷകര്‍ ദേശീയ പതാകയ്ക്കു സമീപം തങ്ങളുടെ കൊടിനാട്ടി.

ലാത്തി ചാര്‍ജും കണ്ണീര്‍ വാതക പ്രയോഗവുമായി സമരക്കാരെ അടിച്ചമര്‍ത്താന്‍ പൊലിസ് ശ്രമിക്കുമ്പോഴും സമരവുമായി മുന്നോട്ടു നീങ്ങുകയാണ് കര്‍ഷകര്‍. രാവിലെ എട്ടോടെയാണ് പൊലിസ് ബാരിക്കേഡുകള്‍ തകര്‍ത്ത് കര്‍ഷകര്‍കര്‍ ട്രാക്ടറുകളുമായി ഡല്‍ഹിയില്‍ എത്തിയത്. കര്‍ഷകരെ നേരിടാന്‍ പൊലിസ് ശ്രമിച്ചതോടെ ഡല്‍ഹിയില്‍ സംഘര്‍ഷാവസ്ഥ നിലനില്‍ക്കുകയാണ്.