മുന്‍ യു.എസ് പ്രസിഡന്റ് ഡോണള്‍ഡ് ട്രംപ് സ്വന്തം സമൂഹമാധ്യമവുമായി രംഗത്ത്. 'ട്രൂത്ത് സോ ഷ്യല്‍' എന്ന ട്രംപിന്റെ സമൂഹമാധ്യമ സംരംഭം ഞായറാഴ്ച ആപ്പിളിന്റെ യു.എസിന്റെ ആപ് സ്റ്റോറില്‍ ലഭ്യമായിത്തുടങ്ങി. എന്നാല്‍ ഇന്ത്യയില്‍ നിലവില്‍ ഇത് ലഭ്യമല്ല.

ട്വിറ്ററിന് സമാനമായ രീതിയിലാണ് ആപ് രൂപകല്‍പ്പന ചെയ്തിരിക്കുന്നത്. മുന്‍ റിപ്പബ്ലിക്കന്‍ പ്രതിനിധി ഡെവിന്‍ നൂണ്‍സിന്റെ നേതൃത്വത്തിലുള്ള ട്രംപ് മീഡിയ ആന്‍ഡ് ടെക്‌നോളജി ഗ്രൂപ്പിനു കീഴിലാണ് ട്രൂത്ത് സോഷ്യലിന്റെ പ്രവര്‍ത്തനം.

കഴിഞ്ഞ വര്‍ഷം നിരവധി സമൂഹമാധ്യമ വിലക്കിന് വിധേയനായ മുന്‍ പ്രസിഡന്റിന്റെ സമൂഹ മാധ്യമങ്ങളിലേക്കുള്ള തിരിച്ചുവരവായാണ് മാധ്യമങ്ങള്‍ ഇതിനെ വിശേഷിപ്പിച്ചത്.

2021 ജനുവരി ആറിന് വാഷിങ്ടണിലെ യു.എസ് ക്യാപിറ്റോളിനു നേരെയുണ്ടായ ട്രംപ് അനുകൂലികളുടെ ആക്രമണത്തെ തുടര്‍ന്ന് അക്രമത്തിന് പ്രേരിപ്പിക്കുന്ന സന്ദേശങ്ങള്‍ പോസ്റ്റ് ചെയ്തുവെന്നാരോപിച്ച് ട്രംപിനെ ട്വി റ്റര്‍, ഫേസ്ബുക്ക്, യൂട്യൂബ് എന്നിവ വിലക്കിയിരുന്നു.