ന്യൂഡൽഹി:1990 ന് ശേഷം രാജ്യസഭയിൽ 100 സീറ്റ് തികയ്ക്കുന്ന പാർട്ടിയായി ബി.ജെ.പി. വ്യാഴാഴ്ച നടന്ന തെരഞ്ഞെടുപ്പിന് ശേഷം ബി.ജെ.പിക്ക് 101 സീറ്റുകളായി. 13 രാജ്യസഭാ സീറ്റിലേക്കാണ് തെരഞ്ഞെടുപ്പ് നടന്നത്. ഇതോടെ 1988-1990 കാലയളവിൽ കോൺഗ്രസിനു ശേഷം 100 സീറ്റ് തികയ്ക്കുന്ന പാർട്ടിയായി ബി.ജെ.പി മാറി.

നേരത്തെ ബി.ജെ.പിക്ക് 97 അംഗങ്ങളാണ് രാജ്യസഭയിലുണ്ടായിരുന്നത്. ഹിമാചൽ പ്രദേശ്, ത്രിപുര, നാഗാലാന്റ്, അസം എന്നിവിടങ്ങളിൽ നിന്ന് ഓരോ അംഗങ്ങൾ കൂടി ബി.ജെ.പിക്ക് ലഭിച്ചു. ബി.ജെ.പി സഖ്യത്തിന് 245 അംഗ സഭയിൽ ഇപ്പോൾ 117 സീറ്റുണ്ട്. നിലവിൽ 236 അംഗങ്ങളിൽ 72 അംഗങ്ങളാണ് രാജ്യസഭയിൽ നിന്ന് വിരമിക്കുന്നത്. ഉത്തർപ്രദേശ്, മഹാരാഷ്ട്ര, തമിഴ്‌നാട്, ആന്ധ്രാപ്രദേശ്, രാജസ്ഥാൻ, ബിഹാർ, കർണാടക, ഒഡിഷ, മധ്യപ്രദേശ് എന്നിവിടങ്ങളിൽ നിന്നുള്ള അംഗങ്ങളാണ് ഈ ഒഴിവിലേക്ക് എത്തുക. 2014 നു മുൻപ് ബി.ജെ.പിക്ക് 47 അംഗങ്ങളായിരുന്നു രാജ്യസഭയിലുണ്ടായിരുന്നത്. കോൺഗ്രസിന് സീറ്റ് കുറഞ്ഞ് 29 ആയി. അകാലിദളിന് രാജ്യസഭയിലെ അംഗത്വം നഷ്ടമായി.