ന്യൂഡല്‍ഹി: പ്രധാനമന്ത്രി നരേന്ദ്രമോദിക്കെതിരായ പരിഹാസ പരാമര്‍ശത്തില്‍ കോണ്‍ഗ്രസ് നേതാവ് പവന്‍ഖേരയെ അസ്റ്റ് ചെയ്തു. അസം പൊലീസ് രജിസ്റ്റര്‍ ചെയ്ത കേസിലാണ് അറസ്റ്റ്. റായ്പൂരില്‍ നടക്കുന്ന കോണ്‍ഗ്രസ് പ്ലീനറി സമ്മേളനത്തില്‍ പങ്കെടുക്കാനായി കോണ്‍ഗ്രസ് നേതാക്കള്‍ക്കൊപ്പം ഡല്‍ഹി വിമാനത്താവളത്തില്‍ എത്തിയതായിരുന്നു ഖേര. എഐസിസി ജനറല്‍ സെക്രട്ടറി കെ.സി വേണുഗോപാല്‍, രണ്‍ദീപ് സുര്‍ജെവാല അടക്കമുള്ള നേതാക്കള്‍ ഖേരയ്‌ക്കൊപ്പം ഉണ്ടായിരുന്നു. റായ്പൂരിലുള്ള ഇന്‍ഡിഗോ വിമാനത്തില്‍ ഇവര്‍ ചെക്ക് ഇന്‍ ചെയ്തതിന് പിന്നാലെ ഡല്‍ഹി പൊലിസ് സംഘം വിമാനത്തിലേക്ക് എത്തുകയും പവന്‍ ഖേരയെ റണ്‍വേയിലേക്ക് ഇറക്കുകയും ചെയ്തു.

കോണ്‍ഗ്രസ് നേതാക്കള്‍ ഖരേയെ കസ്റ്റഡിയിലെടുക്കുന്നത് തടയാന്‍ പരമാവധി ശ്രമിച്ചെങ്കിലും ഉദ്യോഗസ്ഥര്‍ അദ്ദേഹത്തെ റണ്‍വേയില്‍ നിന്നും വിമാനത്താവളത്തിലെ പൊലിസ് സ്റ്റേഷനിലേക്ക് കൊണ്ടു പോയി. വൈകാതെ അദ്ദേഹത്തെ കോടതിയില്‍ ഹാജരാകും. കോടതിയില്‍ നിന്നും ഖരേയെ കസ്റ്റഡിയില്‍ വാങ്ങുമെന്ന് അസം പൊലിസ് അറിയിച്ചു.