ഡെറാഡൂണ്‍: കൊവിഡ് രണ്ടാം തരംഗം രൂക്ഷമാകുന്നതിനിടെ നടന്ന കുംഭമേളയില്‍ പങ്കെടുത്തത് 70 ലക്ഷം തീര്‍ഥാടകരെന്ന് റിപ്പോര്‍ട്ട്. ഹരിദ്വാറില്‍ നടന്ന കുംഭമേള വെള്ളിയാഴ്ച്ചയാണ് സമാപിച്ചത്.

കഴിഞ്ഞ തവണത്തേതിനെ അപേക്ഷിച്ച് കുംഭമേളയുടെ ദിവസങ്ങള്‍ കുറച്ചെങ്കിലും ഗംഗാസ്‌നാനത്തിനായി നിരവധി ആളുകളാണ് എത്തിയത്. മേളയില്‍ പങ്കെടുത്ത 2,600 തീര്‍ത്ഥാടകര്‍ക്ക് കൊവിഡ് സ്ഥിരീകരിച്ചിട്ടുണ്ട്. രണ്ട് ലക്ഷം പേരാണ് കൊവിഡ് ടെസ്റ്റിന് വിധേയരായത്.

190083 കൊവിഡ് ടെസ്റ്റുകളാണ് കുംഭമേളയ്ക്കിടെ നടത്തിയത്. ഇതില്‍ 2642 പേര്‍ കൊവിഡ് പോസിറ്റീവായതെന്ന് ഹരിദ്വാര്‍ ചീഫ് മെഡിക്കല്‍ ഓഫീസര്‍ എസ് കെ ഝാ പറയുന്നത്.

പന്ത്രണ്ട് വര്‍ഷത്തിലൊരിക്കലാണ് കുംഭമേള നടക്കാറുള്ളത്. സാധാരണ മൂന്നു മാസങ്ങളിലായി നടക്കാറുള്ള മേള ഇത്തവണ കൊവിഡ് പ്രതിസന്ധിയെത്തുടര്‍ന്ന് ഒരു മാസമാക്കി ചുരുക്കിയിരുന്നു. മേള കൊറോണ വൈറസിന്റെ സൂപ്പര്‍ സ്പ്രെഡര്‍ ആയേക്കുമെന്ന ഭീഷണികള്‍ക്കിടയിലായിരുന്നു മേള വെട്ടിച്ചുരുക്കിയത്.