ടോക്കിയോ: ജപ്പാന്‍ തലസ്ഥാന നഗരമായ ടോക്കിയോയില്‍ ശക്തമായ ചുഴലിക്കാറ്റുണ്ടാകുമെന്ന മുന്നറിയിപ്പിനെ തുടര്‍ന്ന് 400 ഓളം വിമാനങ്ങളുടെ യാത്ര റദ്ദ് ചെയ്തു. അതിശക്തമായ മുന്ദുലെ ചുഴലിക്കാറ്റ് തിങ്കളാഴ്ച്ചയോടെ ജപ്പാനിലെത്തുമെന്ന കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പിനെ തുടര്‍ന്നാണ് വിമാന സര്‍വീസുകള്‍ റദ്ദ് ചെയ്തത്.

ഉച്ചയ്ക്ക് ശേഷമുള്ള 145 പ്രാദേശിക വിമാനങ്ങള്‍ റദ്ദ് ചെയ്തതായി ജപ്പാന്‍ എയര്‍ലൈന്‍സ് അറിയിച്ചു.

180 കിലോമീറ്റര്‍ വേഗതയിലാവും കാറ്റ് വീശുക. മിയാകെ ദ്വീപില്‍ ഇന്ന് രാവിലെ 25 കിലോമീറ്റര്‍ വേഗതയില്‍ കാറ്റ് വീശിയിരുന്നതായി റിപ്പോര്‍ട്ടുണ്ട്. എന്നാല്‍ ആര്‍ക്കെങ്കിലും പരുക്കേറ്റതായോ നാശനഷ്ടങ്ങള്‍ സംഭവിച്ചതായോ റിപ്പോര്‍ട്ടിലില്ല.

കാറ്റിനൊപ്പം മഴ ശക്തിപ്രാപിക്കുമെന്നും, മണ്ണിടിച്ചിലും വെള്ളപ്പൊക്കവും ഉണ്ടായേക്കുമെന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കിയിട്ടുണ്ട്.