കോഴിക്കോട് : ലക്ഷദ്വീപ് ജനതയുടെ ഉപജീവന മാര്‍ഗവും ആവാസ വ്യവസ്ഥയും തകര്‍ക്കാനുള്ള നീക്കം ഒറ്റക്കെട്ടായി ചെറുക്കണമെന്ന് എളമരം കരീം എം.പി. ലക്ഷദ്വീപ് ജനതയോടുള്ള ക്രൂര നടപടികള്‍ അവസാനിപ്പിക്കുക എന്നാവശ്യപ്പെട്ടുകൊണ്ട് എസ് കെ എസ് എസ് എഫ് സംസ്ഥാന കമ്മിറ്റി കോഴിക്കോട് റെയില്‍വേ സ്റ്റേഷന് മുന്നില്‍ നടത്തിവരുന്ന ദശദിന സമരത്തിന്റെ രണ്ടാം ദിവസം ഉദ്ഘാടനം ചെയ്യുകയായിരുന്നു അദ്ദേഹം.

വികസനത്തിന്റെ മറവില്‍ ക്രൂര നടപടികള്‍ അടിച്ചേല്‍പ്പിക്കാനുള്ള രാഷ്ട്രീയ അജണ്ടയാണ് അവിടെ നടക്കുന്നത്. പ്രതികരിക്കുന്നവരെ രാജ്യദ്രോഹികളാക്കാനാണ് ശ്രമിക്കുന്നത്. ഇത് വകവെച്ച് കൊടുക്കാനാവില്ലെന്നും സമാധാന കാംക്ഷികളായ ലക്ഷദ്വീപ് ജനതയോട് നമ്മുടെ നാട് ചേര്‍ന്ന് നില്‍ക്കുമെന്നും അദ്ദേഹം കൂട്ടിച്ചേര്‍ത്തു.

ടി.പി സുബൈര്‍ മാസ്റ്റര്‍, ഫൈസല്‍ ഫൈസി മടവൂര്‍, സയ്യിദ് മുബഷിര്‍ തങ്ങള്‍ ജമലുല്ലൈലി, അലി അക്ബര്‍ മുക്കം എന്നിവര്‍ പ്രസംഗിച്ചു. മൂന്നാം ദിവസമായ നാളെ സമസ്ത കേന്ദ്ര മുശാവറ അംഗം മുക്കം ഉമര്‍ ഫൈസി ഉദ്ഘാടനം ചെയ്യും.