തിരുവനന്തപുരം: തകര്‍ക്കപെടാന്‍ ശ്രമിക്കുമ്പോള്‍ തിരിച്ചു വരുന്ന ഉജ്വലമായ ചരിത്രമാണ് കോണ്‍ഗ്രസിന്റേതെന്ന് രമേശ് ചെന്നിത്തല. കോണ്‍ഗ്രസിന്റെ ശത്രു കോണ്‍ഗ്രസ് തന്നെയാണ്. ചിരിക്കുന്നവരെല്ലാം നമ്മുടെ സ്‌നേഹിതന്‍മാരാണെന്ന് കരുതരുത്. മുമ്പില്‍ വന്ന് പുകഴ്ത്തുന്നവരൊന്നും നമുക്കൊപ്പം ഉണ്ടാകില്ലെന്ന അനുഭവ പാഠമാണ് തനിക്കുള്ളത്. ഇത് സുധാകരന് പാഠമാകണമെന്നും ചെന്നിത്തല പറഞ്ഞു.

ഇന്ദിരാ ഭവനില്‍ കെ.സുധാകരന്‍ കെ.പി.സി.സി പ്രസിഡന്റായി ചുമതലയേല്‍ക്കുന്ന ചടങ്ങില്‍ സംസാരിക്കുകയായിരുന്നു അദ്ദേഹം.

തനിക്കെതിരേ ആരോപണം വന്നപ്പോള്‍ പാര്‍ട്ടിയില്‍ ആരും പ്രതികരിക്കാതിരുന്ന വേദന മനസിലാക്കിയതാണ്. തനിക്കെതിരേ ബിജെപി ബന്ധം ആരോപിച്ചപ്പോള്‍ ആരും കൂടെയുണ്ടായിട്ടില്ലെന്ന് പറഞ്ഞ ചെന്നിത്തല സുധാകരനെതിരേ ഇതേ ആരോപണം വന്നപ്പോള്‍ താന്‍ പ്രതികരിച്ചുവെന്നും അതായിരിക്കണം കോണ്‍ഗ്രസുകാരുടെ വികാരമെന്നും വ്യക്തമാക്കി.