പത്തനംതിട്ട: ആറന്മുള വിമാനത്താവള പദ്ധതി പ്രദേശത്ത് കുടില്‍ കെട്ടി താമസിക്കുന്ന കുടുംബങ്ങളുടെ പുനരധിവാസം സമയബന്ധിതമായി നടപ്പാക്കുമെന്നു പുതുതായി ചാര്‍ജെടുത്ത പത്തനംതിട്ട കലക്ടര്‍ ആര്‍ ഗിരിജ. കലക്ടറുടെ ചേംബറില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു അവര്‍. നേരത്തേ ഉണ്ടായ കോടതി വിധികളും മറ്റും പഠിച്ച ശേഷം പദ്ധതിക്കായി മണ്ണിട്ടു നികത്തിയ ചാലുകളും തോടുകളും പൂര്‍വ സ്ഥിതിയില്‍ ആക്കുന്നത് സംബന്ധിച്ച് തീരുമാനിക്കുമെന്നും അവര്‍ പറഞ്ഞു.
ജില്ലയിലെ മറ്റൊരു പ്രധാന പ്രശ്‌നമായ തെരുവുനായ ശല്യം സംബന്ധിച്ച് സത്വര നടപടി എടുക്കും. ഇതിനായി ജില്ലാ മൃഗസംരക്ഷണ ഓഫിസറുമായി ചര്‍ച്ച നടത്തും. ജില്ലാ വികസന സമിതിയും ഇതിനായി വിളിച്ചു ചേര്‍ക്കും. തെരുവു നായകളെ വന്ധ്യംകരിച്ച് പാര്‍പ്പിക്കുന്നതിനുള്ള സ്ഥലം കണ്ടെത്തും. ഇതിനായി പൊതുജന സഹകരണം ഉറപ്പു വരുത്തും. വന്ധ്യംകരണത്തിനുള്ള പദ്ധതികള്‍ സമര്‍പ്പിക്കാന്‍ അതാത് തദ്ദേശ സ്വയംഭരണ സ്ഥാപനങ്ങളോട് ആവശ്യപ്പെടും.