ദുബൈ: സ്‌കൂള്‍ തുറക്കുന്ന ദിവസം വിദ്യാര്‍ഥികള്‍ പി.സി.ആര്‍ നെഗറ്റീവ് ഫലം ഹാജരാക്കണമെന്ന നിബന്ധന ദുബൈയില്‍ ഒഴിവാക്കി. ദുബൈയിലെ വിദ്യാഭ്യാസ അതോറിറ്റിയായ കെ.എച്ച്.ഡി.എയാണ് ഇക്കാര്യം അറിയിച്ചത്. എന്നാല്‍ അബൂദബിയിലെ വിദ്യാര്‍ഥികള്‍ക്ക് പി.സി.ആര്‍ ഫലം നിര്‍ബന്ധമാണ്. യു.എ.ഇ ദേശീയ ദുരന്തനിവാരണ അതോറിറ്റിയാണ് 12 വയസിന് മുകളില്‍ പ്രായമുള്ള വിദ്യാര്‍ഥികള്‍ സ്‌കൂളിലെത്തുന്ന ആദ്യദിവസം പി.സി.ആര്‍ നെഗറ്റീവ് ഫലം ഹാജരാക്കണമെന്ന് നിര്‍ദേശിച്ചത്. എന്നാല്‍, ദുബൈയിലെ സ്‌കൂളുകളില്‍ ഈ നിബന്ധനയുണ്ടാവില്ല. എന്നാല്‍, സ്‌കൂളിലെ അടച്ചിട്ട സ്ഥലങ്ങളില്‍ മാസ്‌ക് നിര്‍ബന്ധമാണെന്നും സാമൂഹിക അകലം പാലിക്കണമെന്ന് കെ.എച്ച്.ഡി.എ രക്ഷിതാക്കള്‍ക്ക് അയച്ച സര്‍ക്കുലറില്‍ വ്യക്തമാക്കുന്നുണ്ട്.കൊവിഡ് പോസിറ്റീവായവര്‍ 10ദിവസം ഐസൊലേഷന്‍ പൂര്‍ത്തിയാക്കിയ ശേഷമേ ക്ലാസുകളില്‍ തിരിച്ചെത്താന്‍ പാടുള്ളൂ. കൊവിഡ് സമ്പര്‍ക്കമുള്ളവരും എന്നാല്‍ രോഗലക്ഷണങ്ങളില്ലാത്ത കുട്ടികളും ജീവനക്കാരും ക്വാറന്റീന്‍ പൂര്‍ത്തിയാക്കേണ്ടതില്ല. അബൂദബിയില്‍ ആദ്യ ദിവസം 96 മണിക്കൂറിനിടയിലെ പി.സി.ആര്‍ നെഗറ്റീവ് ഫലം ഹാജരാക്കി വേണം സ്‌കൂളില്‍ പ്രവേശിക്കാന്‍.