ദുബൈ: സ്വന്തം മുഖം മൊബൈല്‍ ഫോണില്‍ കാണിച്ചാല്‍ ദുബൈക്ക് വിസ.ദുബൈയിലെ ജനറല്‍ ഡയറക്ടറേറ്റ് ഓഫ് റെസിഡന്‍സി ആന്‍ഡ് ഫോറിനേഴ്സ് അഫയേഴ്സ് (ജി.ഡി.ആര്‍.എഫ്.എ)യാണ് ആധുനിക സാങ്കേതിക വിദ്യകള്‍ കൊണ്ട് സേവനങ്ങള്‍ ഏറ്റവും എളുപ്പമാക്കാന്‍ ശ്രമിക്കുന്നത്. ഡയരക്ടറേറ്റിന്റെ എല്ലാ സേവനങ്ങളും ഫേഷ്യല്‍ ബയോമെട്രിക് തിരിച്ചറിയല്‍ വഴി നല്‍കുന്ന സംവിധാനം ഉടന്‍ നിലവില്‍ വരുമെന്ന് മുതിര്‍ന്ന ഉദ്യോഗസ്ഥയായ ഫാത്തിമ സലേം അല്‍ മസ്റൂയി ഇന്നലെ പറഞ്ഞു. ഈ പദ്ധതി പൂര്‍ണ്ണമായി നടപ്പിലാക്കിയാല്‍ ദുബൈ നിവാസികള്‍ക്ക് ഡി.ജി.ആര്‍.എഫ്.എ സേവനം ലഭിക്കുന്നതിന് വീട്ടില്‍ നിന്ന് പോലും വിസയ്ക്കും എന്‍ട്രി പെര്‍മിറ്റിനും അപേക്ഷിക്കാന്‍ കഴിയും.റസിഡന്‍സി, വിസ അല്ലെങ്കില്‍ മറ്റേതെങ്കിലും സേവനങ്ങള്‍ക്കായി അപേക്ഷിക്കുന്നതിനും മറ്റു സേവനങ്ങള്‍ക്കും മുഖ ബയോമെട്രിക്‌സ് ഉപയോഗിച്ച് ആക്‌സസ് ചെയ്യാനും പരിശോധിക്കാനും കഴിയും. ദുബൈ നിവാസികള്‍ സ്വയം പരിശോധിക്കാന്‍ പാസ്പോര്‍ട്ടോ മറ്റേതെങ്കിലും രേഖകളോ ഉപയോഗിക്കേണ്ടതില്ലെന്നും അവര്‍ പറഞ്ഞു. നിലവില്‍ ദുബൈ അന്താരാഷ്ട്ര വിമാനത്താവളത്തില്‍ ഫേഷ്യല്‍ ബയോമെട്രിക്കിന്റെ സ്മാര്‍ട്ട് ഗേറ്റ് സംവിധാനം നടപ്പാക്കിയിട്ടുണ്ട്. പ്രവാസികള്‍ക്ക് നൂതന സംവിധാനങ്ങളുടെ എല്ലാ സാധ്യതകളും ഉപയോഗപ്പെടുത്താനുള്ള പ്രവര്‍ത്തനങ്ങള്‍ ദ്രുതഗതിയില്‍ നടന്നു വരികയാണ്.