കൊച്ചി: ആഴക്കടല്‍ മത്സ്യബന്ധന പദ്ധതിയുമായി ബന്ധപ്പെട്ട വിഷയത്തില്‍ പ്രതികരണമാരാഞ്ഞ മാധ്യമപ്രവര്‍ത്തകയെ സമൂഹമാധ്യമങ്ങളിലൂടെ അധിക്ഷേപിക്കുകയും അശ്ലീലം കലര്‍ന്ന സ്റ്റിക്കറുകളിലൂടെ ആക്ഷേപിക്കുകയും ചെയ്ത എന്‍. പ്രശാന്ത് ഐ.എ.എസിനെതിരേ പൊലിസ് കേസെടുത്തു. സ്ത്രീത്വത്തെ അപമാനിച്ചെന്ന കുറ്റം ചുമത്തി ഐ.പി.സി 509 വകുപ്പു പ്രകാരം പാലാരിവട്ടം പൊലിസാണ് കേസ് രജിസ്റ്റര്‍ ചെയ്തതത്. പ്രാഥമികാന്വേഷണത്തില്‍ കുറ്റകൃത്യം നടന്നതായി തെളിഞ്ഞതായി എഫ.്‌ഐ.ആറില്‍ പറയുന്നു.

ആഴക്കടല്‍ മത്സ്യബന്ധന വിവാദവുമായി ബന്ധപ്പെട്ട് വിവരങ്ങള്‍ തേടിയ മാതൃഭൂമി ലേഖികയോടാണ് പ്രശാന്ത് മോശമായി പെരുമാറിയത്. തുടര്‍ന്ന് മാധ്യമപ്രവര്‍ത്തക മുഖ്യമന്ത്രിക്കു പരാതി നല്‍കിയിരുന്നു.
ഈ പരാതി മുഖ്യമന്ത്രി പൊലിസിനു കൈമാറുകയും പ്രാഥമികാന്വേഷണം നടത്തുകയും ചെയ്തിരുന്നു. കേസെടുക്കുന്നതു സംബന്ധിച്ച് ഡയരക്ടറേറ്റ് ഓഫ് പ്രോസിക്യൂഷനില്‍നിന്ന് നിയമോപദേശവും പൊലിസ് തേടിയിരുന്നു. കേസെടുത്ത് അന്വേഷണം നടത്താമെന്നായിരുന്നു നിയമോപദേശം.

മാധ്യമപ്രവര്‍ത്തകര്‍ ഉദ്യോഗസ്ഥനോട് വിവരങ്ങള്‍ തേടുന്നത് തൊഴിലിന്റെ ഭാഗമാണ്. വിവരങ്ങള്‍ നല്‍കാനും നല്‍കാതിരിക്കാനും ഉദ്യോഗസ്ഥന് അവകാശമുണ്ട്. എന്നാല്‍ മോശമായ പ്രതികരണം പാടില്ലെന്നും നിയമോപദേശത്തില്‍ വ്യക്തമാക്കിയിരുന്നു. തുടര്‍ന്നാണ് പൊലിസ് പ്രശാന്തിനെതിരേ കേസെടുത്തത്. അറസ്റ്റ് നടപടിയിലേക്ക് പൊലിസ് ഇപ്പോള്‍ പോകില്ലെന്ന് അറിയുന്നു.