പാരിസ്: ഉപയോക്താക്കള്‍ക്ക് പരസ്യ കുക്കികള്‍ (അഡ്വര്‍ടൈസ്‌മെന്റ് കുക്കീസ്) അടിച്ചേല്‍പ്പിച്ചതിന് യു.എസ് ടെക് ഭീമനായ മൈക്രോസോഫ്റ്റിന് ആറ് കോടി യൂറോ പിഴ ചുമത്തിയതായി ഫ്രാന്‍സിന്റെ സ്വകാര്യതാ നിരീക്ഷണ വിഭാഗം അറിയിച്ചു. നാഷനല്‍ കമ്മീഷന്‍ ഫോര്‍ ടെക്‌നോളജി ആന്റ് ഫ്രീഡംസ് (സി.എന്‍.ഐ.എല്‍) 2022ല്‍ ചുമത്തിയ ഏറ്റവും വലിയ പിഴയാണിത്. കുക്കികള്‍ സ്വീകരിക്കുന്നത് പോലെ തന്നെ നിരസിക്കാന്‍ ഉപയോക്താക്കളെ അനുവദിക്കുന്ന സംവിധാനം മൈക്രോസോഫ്റ്റിന്റെ സെര്‍ച്ച് എഞ്ചിനായ ബിങ് സജ്ജീകരിച്ചിട്ടില്ലെന്ന് സി.എന്‍.ഐ.എല്‍ ചൂണ്ടിക്കാട്ടി.

ഉപയോക്താക്കള്‍ സൈറ്റ് സന്ദര്‍ശിച്ചപ്പോള്‍ കുക്കീസ് അവരുടെ സമ്മതമില്ലാതെ കടന്നുവന്നു. ഈ കുക്കികള്‍ പരസ്യ ആവശ്യങ്ങള്‍ക്കായി ഉപയോഗിച്ചതായി അന്വേഷണത്തില്‍ കണ്ടെത്തി. കുക്കികള്‍ എളുപ്പത്തില്‍ നിരസിക്കാന്‍ അനുവദിക്കുന്ന ഒരു ബട്ടണും ഇല്ലെന്നും സ്ഥിരീകരിച്ചു. തകരാര്‍ പരിഹരിക്കാന്‍ കമ്പനിക്ക് മൂന്ന് മാസത്തെ സമയം നല്‍കിയിട്ടുണ്ട്. അതുവരെ പ്രതിദിനം 60,000 യൂറോ പിഴ നല്‍കണം.

വെബ് കുക്കികള്‍ ഉപയോഗിക്കുന്നതിനുള്ള നിയമങ്ങള്‍ പാലിക്കാത്ത സൈറ്റുകള്‍ക്കെതിരേ നടപടിയുണ്ടാവുമെന്ന് കഴിഞ്ഞ വര്‍ഷം സി.എന്‍.ഐ.എല്‍ മുന്നറിയിപ്പ് നല്‍കിയിരുന്നു. സമാനമായ ലംഘനങ്ങള്‍ക്ക് സി.എന്‍.ഐ.എല്‍ ഗൂഗിളിനും ഫേസ്ബുക്കിനും യഥാക്രമം 150 മില്യണ്‍, 60 മില്യണ്‍ യൂറോ നേരത്തേ പിഴ ചുമത്തിയിരുന്നു.