കാളികാവ്: രാജ്യത്തെ വെറുമൊരു ഭൂപടം മാത്രമായി ചിത്രീകരിക്കാനുള്ള ശ്രമമാണ് പ്രധാനമന്ത്രി നരേന്ദ്ര മോദി നടത്തുന്നതെന്നും ഇന്ത്യയുടെ പൈതൃകങ്ങളും സംസ്‌കാരങ്ങളും ഉള്‍ക്കൊള്ളാന്‍ തയാറാകാത്ത പ്രധാനമന്ത്രിയുടെ നയത്തിനെതിരേ പോരാട്ടം തുടരുമെന്നും രാഹുല്‍ ഗാന്ധി പറഞ്ഞു. ഇന്ത്യ ജീവല്‍ തുടിപ്പുള്ള സംസ്‌കാര ഭൂമിയാണ്. സവര്‍ക്കറെ അംഗീകരിക്കുന്നവര്‍ക്ക് ഇത് ഉള്‍ക്കൊള്ളാന്‍ കഴിയില്ല. പ്രധാനമന്ത്രിയുടെ ഇത്തരം നീക്കങ്ങള്‍ക്കെതിരേ ജനങ്ങളുടെ പിന്തുണ വേണമെന്നും രാഹുല്‍ ഗാന്ധി ആവശ്യപ്പെട്ടു. 

മലപ്പുറം കാളികാവില്‍ ഹിമ ഡയാലിസിസ് സെന്റര്‍ ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. മാനസിക വെല്ലുവിളി നേരിടുന്നവര്‍ക്കുള്ള പുനരധിവാസ കേന്ദ്രത്തിന്റെ ശിലാസ്ഥാപന കര്‍മം സാദിഖലി ശിഹാബ് തങ്ങള്‍ നിര്‍വഹിച്ചു. ഡയാലിസിസ് സെന്റര്‍ ഉദ്ഘാടന ചടങ്ങില്‍ അബ്ബാസലി ശിഹാബ് തങ്ങള്‍ അധ്യക്ഷനായി. എം.പി അബ്ദുസമദ് സമദാനി എം.പി രാഹുല്‍ ഗാന്ധിയുടെ പ്രഭാഷണം പരിഭാഷപ്പെടുത്തി. സമസ്ത കേരള ജംഇയ്യത്തുല്‍ ഉലമ ജന. സെക്രട്ടറി കെ. ആലിക്കുട്ടി മുസ്‌ലിയാര്‍, പ്രതിപക്ഷ നേതാവ് വി.ഡി സതീശന്‍, കെ.സി വേണുഗോപാല്‍ എം.പി, പി.വി അബ്ദുല്‍ വഹാബ് എം.പി, എ.പി അനില്‍കുമാര്‍ എം.എല്‍.എ, സമസ്ത കേന്ദ്ര മുശാവറ അംഗം വാക്കോട് മൊയ്തീന്‍ കുട്ടി ഫൈസി, അബ്ദുല്‍ ഹമീദ് ഫൈസി അമ്പലക്കടവ്, മൊയ്തീന്‍ ഫൈസി പുത്തനഴി, ഹിമ ജന. സെക്രട്ടറി ഫരീദ് റഹ്മാനി കാളികാവ്, പി.കെ സലാം ഫൈസി സംസാരിച്ചു.