അഡീഷനൽ ചീഫ് സെക്രട്ടറി ടി.കെ ജോസ് ഉൾപ്പെടെയുള്ളവരും അറിഞ്ഞെന്ന് മിനുട്സ് രേഖ
തിരുവനന്തപുരം: മുല്ലപ്പെരിയാറിലെ ബേബി ഡാമിന് സമീപമുള്ള ഭൂമിയിൽ നിന്ന് മരംമുറിക്കാനുള്ള ഉത്തരവ് ഇറങ്ങുന്നതിലേക്ക് നയിച്ച സംയുക്തയോഗത്തിന്റെ മിനുട്സ് പുറത്ത്. സെപ്റ്റംബർ 17ന് കേരളത്തിന്റെയും തമിഴ്നാടിന്റെയും റവന്യൂ, ജലവിഭവ വകുപ്പുകളിലെ 25 ഓളം ഉദ്യോഗസ്ഥർ പങ്കെടുത്ത സംയുക്തയോഗത്തിന്റെ മിനുട്സാണ് പുറത്തുവന്നത്. മരംമുറിക്കുന്നതിന് മുന്നോടിയായി ഇതുസംബന്ധിച്ച് കേരളവും തമിഴ്നാടും വിശദമായ ചർച്ചകൾ നടത്തിയിരുന്നതായാണ് മിനുട്സിലെ വിവരങ്ങളിൽ നിന്ന് വ്യക്തമാവുന്നത്.മരംമുറി വലിയ വിവാദങ്ങൾക്ക് വഴിവച്ചതോടെ ഇതുസംബന്ധിച്ച് തമിഴ്നാടിന് നൽകിയ അനുമതി ബുധനാഴ്ച സംസ്ഥാന മന്ത്രിസഭ റദ്ദാക്കുകയും ഉത്തരവ് ഇറക്കിയ ചീഫ് വൈൽഡ് ലൈഫ് വാർഡൻ ബെന്നിച്ചൻ തോമസിനെ സസ്പെൻഡ് ചെയ്യുകയും ചെയ്തിരുന്നു. എന്നാൽ, ബെന്നിച്ചൻ തോമസിന് മാത്രമല്ല വിവാദത്തിൽ പങ്കുള്ളതെന്നും അഡീഷനൽ ചീഫ് സെക്രട്ടറി ടി.കെ ജോസ് ഉൾപ്പെടെയുള്ളവരും മരംമുറി ഉത്തരവ് സംബന്ധിച്ച് എല്ലാം അറിഞ്ഞിരുന്നുവെന്നും മിനുട്സിലെ വിവരങ്ങളിൽ നിന്ന് വ്യക്തമാണ്. തമിഴ്നാടിന്റെ അംഗീകാരത്തിനായി ടി.കെ ജോസ് മിനുട്സ് അയച്ചുകൊടുത്തിരുന്നു. ഇതിൽ മരംമുറിക്ക് അനുമതി നൽകുന്നതും മുല്ലപ്പെരിയാറിലേക്കുള്ള റോഡിന് അനുമതി നൽകുന്ന കാര്യവും പരിഗണനയിലെന്ന് പറയുന്നുണ്ട്. നവംബർ രണ്ടിനാണ് മിനുട്സ് തമിഴ്നാടിന് അയച്ചുകൊടുത്തത്.