ന്യൂഡൽഹി
'ഞാൻ സൈനികന്റെ പത്നിയാണ്, പുഞ്ചിരിയോടെ വേണം അദ്ദേഹത്തിന് യാത്രയയപ്പ് നൽകാൻ.'
കുനൂരിൽ ഹെലികോപ്ടർ അപകടത്തിൽ ദാരുണാന്ത്യം നേരിട്ട ബ്രിഗേഡിയർ എൽ.എസ് ലിഡ്ഡറുടെ സംസ്‌കാര ചടങ്ങിൽ ഭാര്യ ഗീതിക ലിഡ്ഡെറുടെ വാക്കുകൾ കണ്ടുനിന്നവരുടെ കണ്ണുകൾ നനയിച്ചു. തൻ്റെ ഭർത്താവിൻ്റെ വേർപാടിൽ തനിക്ക് ദുഃഖത്തേക്കാൾ അഭിമാനമാണ് തോന്നുന്നതെന്നും ജീവനേക്കാൾ വലുതായിരുന്നു അദ്ദേഹമെന്നും അവർ പറഞ്ഞു.
''''അദ്ദേഹത്തിന് വിട നൽകാൻ എത്രപേരാണ് എത്തിയതെന്ന് നോക്കൂ.. മികച്ച വ്യക്തിത്വമായിരുന്നു അദ്ദേഹത്തിൻ്റേത്. എപ്പോഴും സ്‌നേഹം നൽകുമായിരുന്നു. അദ്ദേഹത്തിന് ഏറ്റവും നല്ല യാത്രയയപ്പ് നൽകണം. പുഞ്ചിരിയോടെ വിട നൽകണം. താൻ സൈനികന്റെ ഭാര്യയാണ്. കൂടുതലൊന്നും പറയാനില്ല.'''' എന്നായിരുന്നു തേങ്ങലടക്കിയുള്ള അവരുടെ പ്രതികരണം.
''''അദ്ദേഹം നല്ല പിതാവായിരുന്നു. കുട്ടികൾക്ക് അതിയായ ദുഃഖവും ഒറ്റപ്പെടലും അനുഭവപ്പെടുന്നുണ്ട്. ജീവിതം ദൈർഘ്യം കൂടിയതുപോലെ തോന്നുന്നു. ദൈവ നിശ്ചയപ്രകാരം അദ്ദേഹത്തിൻ്റെ അസാന്നിധ്യത്തിൽ ഞങ്ങൾ ശിഷ്ടകാലം ജീവിക്കും''''. ഗീതിക പറഞ്ഞു.
പിതാവ് നല്ല സുഹൃത്തായിരുന്നുവെന്ന് ലിഡ്ഡറുടെ മകൾ 17 കാരിയായ ആഷ്‌ന പറഞ്ഞു. പിതാവ് തൻ്റെ ഹീറോ ആയിരുന്നു. രാജ്യത്തിന് അദ്ദേഹത്തിൻ്റെ വിയോഗം നഷ്ടമാണ്. തൻ്റെ ഏറ്റവും വലിയ പ്രചോദകൻ കൂടിയായിരുന്നു അദ്ദേഹമെന്നും ആഷ്‌ന പറഞ്ഞു.