തിരുവനന്തപുരം: സൂപ്പര്‍ ഓവറിന്റെ അവസാനത്തില്‍ നമുക്ക് ജയിക്കാന്‍ സാധിച്ചെന്ന് യു.ഡി.എഫ് സ്ഥാനാര്‍ഥിയും സിറ്റിങ് എംപിയുമായ ശശി തരൂര്‍. പ്രതീക്ഷിക്കാത്ത വെല്ലുവിളി നേരിടേണ്ടി വന്നെങ്കിലും അവസാനത്തില്‍ അനന്തപുരിയിലെ ജനങ്ങള്‍ തനിക്ക് മൂന്ന് തവണ തന്ന വിശ്വാസം നാലാം തവണയും തന്നെന്നും തരൂര്‍ പറഞ്ഞു. മാധ്യമങ്ങളോടായിരുന്നു അദ്ദേഹത്തിന്റെ പ്രതികരണം. 

കടുത്ത മത്സരം നടന്ന തിരുവനന്തപുരം മണ്ഡലത്തില്‍ ഒരു സമയം ബി.ജെ.പി നേതാവും കേന്ദ്ര മന്ത്രിയുമായ രാജീവ് ചന്ദ്രശേഖര്‍ വ്യക്തമായ ലീഡ് നേടിയിരുന്നു. എന്നാല്‍ തിരുവനന്തപുരത്തെ തീരദേശ മേഖലകളിലേക്ക് വോട്ടെണ്ണല്‍ എത്തിയതോടെ തരൂര്‍ തിരിച്ചടിച്ചു. നിലവില്‍ പതിനയ്യായിരം വോട്ടിന്റെ വ്യക്തമായ ഭൂരിപക്ഷത്തില്‍ ശശി തരൂര്‍ വിജയത്തിലേക്ക് കുതിക്കുകയാണ്. എല്‍.ഡി.എഫ് സ്ഥാനാര്‍ഥി പന്ന്യന്‍ രവീന്ദ്രന്‍ മൂന്നാം സ്ഥാനത്തേക്ക് പിന്തള്ളപ്പെടുകയും ചെയ്തിട്ടുണ്ട്.