തിരുവനന്തപുരം: തിരുവനന്തപുരത്തും നിപ പരിശോധന. തിരുവനന്തപുരം സ്വദേശികള്‍ മലപ്പുറത്ത് വന്നിരുന്നുവെന്നാണ് റിപ്പോര്‍ട്ട്. നാലുപേരാണ് തിരുവനന്തപുരത്ത് സമ്പര്‍ക്ക പട്ടികയിലുള്ളത്. ഇവരുടെ സാമ്പിളുകള്‍ പരിശോധനക്ക് അയക്കും. ഇതില്‍ ഒരാള്‍ മാത്രമാണ് ചെറുതായെങ്കിലും രോഗലക്ഷണങ്ങള്‍ കാണിക്കുന്നത്. ഇയാള്‍ തിരുവനന്തപുരം മെഡിക്കല്‍ കോളജിലാണ് ഉള്ളത്. ഇയാള്‍ക്ക് പനി മാറാത്തതിനാലാണ് ആശുപത്രിയിലാക്കിയത്. വീട്ടുകാരുടെ സംശയം ദുരീകരിക്കുന്നതിന് കൂടിയാണ് പരിശോധനയെന്നും ആരോഗ്യ വിദഗ്ധര്‍ അറിയിച്ചു. 

അതിനിടെ, മലപ്പുറത്ത് നിപ ബാധിച്ച് മരിച്ച 14 കാരന്റെ പുതിയ റൂട്ട് മാപ്പ് ആരോഗ്യവകുപ്പ് പുറത്തിറക്കി. നേരത്തെ പ്രാഥമിക റൂട്ട് മാപ്പ് തയാറാക്കിയിരുന്നു. എന്നാല്‍ രോഗിയുടെ മരണത്തെ തുടര്‍ന്നാണ് കുറച്ചുകൂടി വിശദമായ റൂട്ട് മാപ്പ് പുറത്തിറക്കിയത്.

പുതുക്കിയ ഹൈറിസ്‌ക്ക് പട്ടികയില്‍ 101 പേരെ ഉള്‍പെടുത്തിയിട്ടുണ്ട്. ഇതില്‍ 68 പേര്‍ ആരോഗ്യ പ്രവര്‍ത്തകരാണ്. പാലക്കാട്, തിരുവനന്തപുരം ജില്ലയില്‍ നിന്നുള്ളവരും ഹൈറിസ്‌ക്ക് പട്ടികയിലുണ്ട്. 

റൂട്ട് മാപ്പില്‍ പ്രതിപാദിച്ച സ്ഥലങ്ങളില്‍ സന്ദര്‍ശിച്ചിട്ടുള്ളവര്‍ എത്രയും വേഗം കണ്‍ട്രോള്‍ റൂമില്‍ വിളിച്ച് അറിയിക്കണമെന്ന് ആരോഗ്യ വകുപ്പ് നിര്‍ദേശിച്ചു. മെഡിക്കല്‍ കോളജ് ആശുപത്രിയില്‍ ചികിത്സയിലിരിക്കെ ഞായറാഴ്ച രാവിലെ 11.30ഓടെയാണ് മലപ്പുറം പാണ്ടിക്കാട് സ്വദേശിയായ അഷ്മില്‍ ഡാനിഷ് മരിച്ചത്.