ഇരുചക്ര വാഹനങ്ങളുടെ ലൈസന്‍സ് എടുക്കുന്നതിന് എം80 സ്‌കൂട്ടര്‍ ഉപയോഗിക്കാനുള്ള അനുമതി ഇല്ലാതായതോടെ പരീക്ഷ തോല്‍ക്കുന്നവരുടെ എണ്ണം ഇരട്ടിയായി വര്‍ധിച്ചു. ഇന്നലെ മുതലായിരുന്നു ഡ്രൈവിങ്ങ് ടെസ്റ്റിന് എം80 ക്ക് പകരം ഗിയറുള്ള ബൈക്ക് ഉപയോഗിച്ച് തുടങ്ങിയത്. സംസ്ഥാനത്തിന്റെ പല ഭാഗത്തും ഇന്നലെ നടന്ന ടെസ്റ്റില്‍ നിരവധി പേരാണ് പരാജയപ്പെട്ടത്.

ഡ്രൈവിങ്ങ് ടെസ്റ്റിന് എത്തിയവരില്‍ അധികവും ഡ്രൈവിംഗ് സ്‌കൂളുകളില്‍ പരിശീലനം നടത്തിയിരുന്നത് എം80 സ്‌കൂട്ടറിലാണ്. വേഗത നേരത്തെ സെറ്റ് ചെയ്ത ഗിയറില്ലാത്ത സ്‌കൂട്ടറില്‍ 'എട്ട്' എടുക്കുന്നത് വളരെ എളുപ്പമായിരുന്നു. ഡ്രൈവിംഗ് ടെസ്റ്റ് ഗിയറുള്ള ബൈക്കിലേക്ക് മാറിയതാണ് മിക്കവര്‍ക്കും തിരിച്ചടിയായത്. ടെസ്റ്റിനെത്തിയ പലരും ചുരുങ്ങിയ ദിവസം മാത്രമാണ് ബൈക്കില്‍ പരിശീലനം നടത്തിയത്. ടെസ്റ്റിനിടെ കാല്‍ കുത്തിയതാണ് അധികമാളുകളും പരാജയപ്പെടാനുള്ള കാരണം. എറണാകുളം കാക്കനാട് ഇന്നലെ ടെസ്റ്റിനെത്തിയ 48 പേരില്‍ 18 പേരാണ് ആകെ ടെസ്റ്റ് വിജയിച്ചത്. ബാക്കി 30 പേരും പരാജയപ്പെട്ടു.

ഗതാഗത മന്ത്രിയായി ചുമതലയേറ്റതിനു പിന്നാലെയാണ് കെ.ബി ഗണേഷ് കുമാര്‍ കേരളത്തിലെ കാലഹരണപ്പെട്ട ഡ്രൈവിംഗ് പരിശീലന സമ്പ്രദായവും ലൈസന്‍സ് നല്‍കാനുള്ള ടെസ്റ്റും പരിഷ്‌കരിക്കാനുള്ള തീരുമാനം എടുത്തത്. ആദ്യമെല്ലാം വലിയ എതിര്‍പ്പ് ഉയര്‍ന്നെങ്കിലും സര്‍ക്കാര്‍ തീരുമാനവുമായി മുന്നോട്ടു പോകുകയായിരുന്നു.