മേപ്പാടി: വയനാട് ഉരുള്‍പൊട്ടലുണ്ടായ ദുരന്തഭൂമിയില്‍ ജനകീയ തെരച്ചില്‍ പുരോഗമിക്കവെ വിങ്ങിപ്പൊട്ടി വനം മന്ത്രി എ.കെ ശശീന്ദ്രന്‍. ഉരുള്‍പൊട്ടലില്‍ കാണാതായ പിതാവിനെ തിരയുന്ന മകനെ കണ്ടാണ് അദ്ദേഹം പൊട്ടിക്കരഞ്ഞത്. 

മുണ്ടക്കൈ മുസ്‌ലിം പള്ളിക്ക് എതിര്‍വശത്ത് വീടുണ്ടായിരുന്ന നാസറിന്റെ മകനെ ചേര്‍ത്തുപിടിച്ചാണ് മന്ത്രി വിതുമ്പിയത്. വല്ലാത്തൊരു അനുഭവമായിപ്പോയിയെന്നും ഇത്തരം കാഴ്ച്ചകള്‍ കാണാനുള്ള യോഗമാണല്ലോ ഉണ്ടായതെന്നും പറഞ്ഞാണ് അദ്ദേഹം കരഞ്ഞത്. 

ഇങ്ങനെയൊരു കാഴ്ചയ്ക്ക് സാക്ഷിയാകേണ്ടിവരുമെന്ന് ജീവിതത്തില്‍ ഒരിക്കലും പ്രതീക്ഷിച്ചില്ല. ഇവരോട് ഞാന്‍ എന്തുത്തരം പറയും? ദുരന്തത്തിന്റെ വ്യാപ്തി അനുഭവിച്ചു. ഈ അനുഭവം എല്ലാവര്‍ക്കും ഉണ്ടാവും. മനുഷ്യന്റെ പ്രവര്‍ത്തനങ്ങള്‍ക്കൊക്കെ ഇത്രയേ ആയുസുള്ളൂ. നമ്മുടെ ജീവിതത്തിലൊക്കെ എന്ത് ദുരന്തമാണ് ഉണ്ടാവുകയെന്ന് ആര്‍ക്കാണ് പറയാന്‍ കഴിയുക. എല്ലാവരും നമ്മുടെ ബന്ധുക്കളാണ്. നമ്മുടെ വാക്കും പ്രവര്‍ത്തനങ്ങളും അവര്‍ക്ക് ആത്മവിശ്വാസം നല്‍കുന്നതായിരിക്കണം. അവരെ സാധാരണ ജീവിതത്തിലേക്ക് കൊണ്ടുവരണം. ആ പ്രതിജ്ഞയാണ് ഇത്തരം ഘട്ടങ്ങളില്‍ എടുക്കേണ്ടതെന്നും മന്ത്രി പറഞ്ഞു.