ഒളിംപിക്‌സ് മെഡല്‍ വേട്ടയില്‍ അവസാന ദിവസം ചൈനയെ പിന്തള്ളി യുഎസ് ഒന്നാം സ്ഥാനത്തെത്തി. വനിതാ ബാസ്‌കറ്റ് ബോളില്‍ ഫ്രാന്‍സിനെ പരാജയപ്പെടുത്തി യുഎസ് സ്വര്‍ണം നേടി. ഇതോടെ യുഎസിനും ചൈനയ്ക്കും 40 സ്വര്‍ണം വീതമായി. 44 വെള്ളിയും 42 വെങ്കലവുമായി യുഎസിന് 126 മെഡലുകളും, 27 വെള്ളിയും 24 വെങ്കലവുമായി ചൈനയ്ക്ക് 91 മെഡലുകളുമാണുള്ളത്. ഇതോടെ യുഎസ് ഒളിംപിക്‌സിലെ ഒന്നാം സ്ഥാനം നിലനിര്‍ത്തി.

ഒളിംപിക്‌സ് ഉത്സവക്കാഴ്ചകള്‍ക്ക് ഇന്ന് പാരിസില്‍ കൊടിയിറങ്ങും. ഇന്ത്യന്‍ സമയം രാത്രി 12.30ന് സ്റ്റാഡ് ദ് ഫ്രാന്‍സ് സ്‌റ്റേഡിയത്തില്‍ സമാപനച്ചടങ്ങുകള്‍ ആരംഭിക്കും. ഒളിംപിക്‌സിലെ ഇന്ത്യയുടെ മത്സരങ്ങള്‍ ഇന്നലെ അവസാനിച്ചു. ഒരു വെള്ളിയും 5 വെങ്കലവുമാണ് പാരിസില്‍ നിന്ന് ഇന്ത്യ നേടിയെടുത്തത്. ഇന്നത്തെ ഒളിംപിക്‌സ് സമാപന ചടങ്ങ് രണ്ടര മണിക്കൂറോളം നീളുമെന്നാണ് അറിയിച്ചിരിക്കുന്നത്. സമാപന മാര്‍ച്ച് പാസ്റ്റില്‍, ഹോക്കിയില്‍ വെങ്കലം നേടിയ ഇന്ത്യന്‍ ടീം ഗോള്‍ കീപ്പര്‍ പി.ആര്‍. ശ്രീജേഷും, ഇരട്ടവെങ്കലം നേടി പാരിസില്‍ ഇന്ത്യയുടെ അഭിമാനമായ ഷൂട്ടിങ് താരം മനു ഭാക്കറും ഇന്ത്യന്‍ പതാകയേന്തും. 2028ല്‍ യുഎസ് നഗരമായ ലോസ് ആഞ്ചലസാണ് അടുത്ത ഒളിംപിക്‌സിനു വേദിയാവുക.