പോർട്ട് ബ്ലെയർ: ആൻഡമാനിന് സമീപം കടലിൽ ചരക്കുകപ്പൽ മുങ്ങി. കൊൽക്കത്തയിൽ നിന്ന് പോർട്ട് ബ്ലെയറിലേക്കുള്ള യാത്രാമധ്യേയാണ് വ്യാപാര കപ്പൽ മുങ്ങിയത്. കപ്പലിൽ നിന്ന് 11 പേരെ ഇന്ത്യൻ തീരസംരക്ഷണസേന രക്ഷപ്പെടുത്തി. 

എംവി ഐ.ടി.ടി പ്യൂമ എന്ന ചരക്കു കപ്പലിൽ നിന്നാണ് 11 പേരെ ഇന്ത്യൻ കോസ്റ്റ് ഗാർഡ് രക്ഷിച്ചത്. സാഗർ ഐലൻഡിൽ നിന്നും 90 നോട്ടിക്കൽ മൈൽ അകലെ വെച്ചാണ് കപ്പൽ അപകടത്തിൽപ്പെട്ടത്. 

കോസ്റ്റ് ഗാർഡിൻ്റെ സാരംഗ്, അമോഗ് എന്നീ കപ്പലുകൾ, ഒരു സിജി ഡോർണിയർ വിമാനത്തിൻ്റെ പിന്തുണയോടെയാണ് വെല്ലുവിളി നിറഞ്ഞ കടൽസാഹചര്യങ്ങളിലൂടെ രക്ഷാദൗത്യം നടത്തിയത്.