പാലക്കാട്: ഓണാവധിയും ഉത്സവവുമെത്തിയതോടെ കേരളത്തിലൂടെ ഓടുന്ന ട്രെയിനുകളില്‍ കാല്‍ കുത്താനിടമില്ലാത്ത സ്ഥിതി. വെള്ളിയാഴ്ച ഓഫിസും വിദ്യാലയങ്ങളും അടച്ചതോടെ നാട്ടിലെത്താനുള്ള വഴികള്‍ തേടി നെട്ടോട്ടത്തിലാണ് ആളുകള്‍.  അയല്‍സംസ്ഥാനങ്ങളിലെ പ്രധാന നഗരങ്ങളില്‍നിന്ന് പുറപ്പെടുന്ന ട്രെയിനുകളില്‍ ജനറല്‍ കോച്ചുകള്‍ അനുവദിക്കുന്നതിനു പകരം ഓരോ സ്ലീപ്പര്‍ കോച്ചുകള്‍ മാത്രം അനുവദിച്ച് ഉത്തരവാദിത്തത്തില്‍നിന്ന് ഒഴിഞ്ഞുമാറുകയാണ് റെയില്‍വേ.

കൊവിഡിന് മുമ്പുവരെ മിക്ക ട്രെയിനുകളിലും മുന്നിലും പിന്നിലുമായി നാല് ജനറല്‍ കോച്ചുകള്‍ ഉണ്ടായിരുന്നെങ്കില്‍ ഇപ്പോള്‍ അത് രണ്ടും മൂന്നുമായി ചുരുക്കി. ബംഗളൂരു, ചെന്നൈ, സേലം, ഈറോഡ്, പൊള്ളാച്ചി, കോയമ്പത്തൂര്‍ എന്നിവിടങ്ങളിലെ വിദ്യാഭ്യാസ സ്ഥാപനങ്ങളില്‍ കേരളത്തിലെ നിരവധി വിദ്യാര്‍ഥികളാണ് പഠിക്കുന്നത്. ഇവര്‍ക്ക് നാട്ടിലെത്താന്‍ ആശ്രയം ട്രെയിനുകളാണ്. സ്ലീപ്പര്‍ ടിക്കറ്റ് ലഭിക്കാത്തവര്‍ ആശ്രയിക്കുന്നത് ജനറല്‍ കോച്ചുകളാണ്.

ഉത്തരേന്ത്യന്‍ സംസ്ഥാനങ്ങളിലെ ആഘോഷങ്ങള്‍ക്കും ഉത്സവങ്ങള്‍ക്കും കേരളത്തില്‍നിന്നുപോലും ജനറല്‍ കോച്ച് മാത്രം ഉള്‍പ്പെടുത്തി സ്‌പെഷല്‍ സര്‍വിസ് നടത്താറുണ്ട് റെയില്‍വേ.